Դեսպան Ներսեսյանը Քինգս քոլեջում ներկայացրել է Հայաստանի անվտանգության արդի մարտահրավերները

ՄԹ-ում ՀՀ դեսպան Վարուժան Ներսեսյանն այցելել է Քեմբրիջի համալսարան, որտեղ ելույթով հանդես է եկել Քինգս քոլեջի քաղաքական քննարկումների ակումբում: Այս մասին տեղեկացնում է Մեծ Բրիտանիայում ՀՀ դեսպանությունը:

Իր խոսքում դեսպան Վ.Ներսեսյանը ներկայացրել է Հայաստանի Հանրապետության անվտանգության արդի մարտահրավերները` ընդգծելով, որ Ադրբեջանի մշտական սադրանքները խոչընդոտում են տարածաշրջանում խաղաղության հաստատմանն ուղղված ջանքերը:

Նա մանրամասն ներկայացրել է ՀՀ դեմ դեմ վերջին շրջանում ծավալված մեծածավալ ագրեսիայի հետևանքները, որի արդյունքում հարյուրավոր զոհեր են եղել և առանց տարբերակման թիրախավորվել են քաղաքացիական ենթակառուցվածքները: Այս համատեքստում, նա ընդգծեց Ադրբեջանի զինված ուժերի՝ ՀՀ միջազգայնորեն ճանաչված տարածքներից անհապաղ դուրս բերելու անհրաժեշտությունը:

Դեսպան Ներսեսյանը ներկայացրել է հայկական կողմի դիրքորոշումը Լեռնային Ղարաբաղի հիմնահարցը գործող միջազգային մեխանիզմների շրջանակներում կարգավորելու կապակցությամբ, որոնք պետք է ապահովեն Լեռնային Ղարաբաղի հայերի անվտանգությունն ու բոլոր իրավունքները։

Դեսպանն ընդգծեց Ադրբեջանում անօրինական կերպով պահվող տասնյակ հայ ռազմագերիներին անհապաղորեն ազատ արձակելու անհրաժեշտությունը, որոնք արդեն երկու տարի պահվում են այդ երկրում, ի խախտումն Նոյեմբերի 9-ի եռակողմ

հայտարարության։ Նա հավելեց, որ ադրբեջանցի զինվորականների կողմից հայ ռազմագերիների արտադատական սպանություններն ու նրանց նկատմամբ անմարդկային վերաբերմունքը հանդիսանում պատերազմական հանցագործություն եւ պետք է անվերապահորեն պատժվեն:

Դեսպան Ներսեսյանն ավարտեց իր ելույթը շնորհակալություն հայտնելով Քինգս Քոլեջին քաղաքական ֆորումին հյուրընկալության համար, այնուհետև պատասխանեց ներկաների հարցերին: