Ադրբեջանի ԱԳՆ-ն կոչ է արել ճնշում գործադրել Հայաստանի վրա. Բաքվում Երևանը շփոթել են իրենց հետ

Հայկական կողմը «նպատակաուղղված կերպով շարունակում է Ադրբեջանի դեմ ուղղված ռազմական սպառնալիքները»։ Այս մասին զառանցանք-հայտարարություն տարածել է Ադրբեջանի ԱԳՆ-ն։

«Վերոնշյալը ևս մեկ անգամ վկայում է այն մասին, որ հայկական կողմը նպատակաուղղված շարունակում է ռազմական սպառնալիքները Ադրբեջանի դեմ։ Երևանի այս գործունեությունը ռազմական հանցագործություն է, միջազգային մարդասիրական իրավունքի և Հայաստանի պարտավորությունների կոպիտ խախտում, և պետք է ճնշում գործադրել Հայաստանի վրա։ Ադրբեջանական կողմը բազմիցս կոչ է արել մոբիլիզացնել ջանքերը՝ վերացնելու այդ սպառնալիքները։ Այդ կապակցությամբ այս տարվա օգոստոսի 23-ին Ադրբեջանի արտաքին գործերի նախարարը համապատասխան նամակ է հղել ՄԱԿ-ի գլխավոր քարտուղար Անտոնիո Գուտերեշին, և նամակը տրամադրվել է ՄԱԿ-ի բոլոր անդամներին»։

Հայտարարության մեջ նշվում է նաև, որ պետք է ճնշում գործադրել Հայաստանի վրա և այդ քայլերը կնպաստեն տարածաշրջանում խաղաղության և անվտանգության ապահովմանը։

Բաքվում, հավանաբար, շփոթել են, թե ով է ագրեսորը, ով՝ ագրեսիայի ենթարկվողը: 

Ադրբեջանի ԱԳՆ այս հայտարարությունը հանգիստ կարելի էր վերագրել հենց Ադրբեջանին, եթե այնտեղ գրված չլիներ «Հայաստան» բառը:

Ի՞նչ ռազմական սպառնալիքների մասին է խոսում Բաքուն, երբ ամենօրյա ռեժիմով ինքը կրակում է հայկական դիրքերի ուղղությամբ:

Ավելին՝ նույն Բաքուն է, որ չի բավարարվել Արցախի Հանրապետության շուրջ մեկ տասնյակ շրջաններ օկուպացնելով և ռազմական ճանապարհով ներխուժել է նաև Հայաստանի Հանրապետության սուվերեն տարածք, գրավել Սև լիճը, մի քանի տասնյակ քառակուսի կիլոմետր օկուպացրել սեպտեմբերի 13-14-ի ռազմական ագրեսիայի ընթացքում:

Էլ չենք խոսում Հայաստանի իշխանության կրավորական ու հլու-հնազանդ կերպարով իշխանականների հետ ձեռք-ձեռքի տված Կապան-Ճակատեն ճանապարհը խլել-ստանալու մասին:

Բաքուն է, որ այսքանով չի բավարարվել ու հոխորտում է Հայաստանի տարածքով միջանցք ստանալու մասին: Ի՞նչ խաղաղության, ի՞նչ անվտանգության մասին է խոսում պետությունը, որին միջազգային հանրությունը շատ ուշացումով ու զգուշավորությամբ, բայց ագրեսոր որակեց: 

Մարդասիրական իրավունքից խոսում է մի երկիր, որը ֆոսֆոր էր թափում մարդկանց գլխին Արցախյան երրորդ պատերազմում, երկիրը, որը խոշտանգում, մասնատում ու բռնաբարում է նույնիսկ կին զինծառայողներին: 

Այնպես որ, Ադրբեջանի ԱԳՆ-ի սփիչմեյքերները նման հայտարարություններ անելուց առաջ, լավ կլինի իրենց առաջ հայելի ունենան՝ հաջորդ անգամ մեզ իրենց հետ չշփոթելու համար: 

NEWSPRESS.am