Վաշինգտոնյան տարբերակը շատ պարզ է՝ հանձնել Ղարաբաղը և դուրս բերել ՀՀ-ից ռուսական զորքը. Սեմյոն Բաղդասարով

Վլադիմիր Սոլովյովի հեղինակային հաղորդման ժամանակ Մերձավոր Արևելքի և Կենտրոնական Ասիայի երկրների ուսումնասիրման կենտրոնի տնօրեն Սեմյոն Բաղդասարովը խոսել է Վաշինգտոնյան դեկլարացիայի մասին։

Նրա խոսքով՝ Ադրբեջանի և Հայաստանի միջև ստորագրվելիք վաշինգտոնյան տարբերակում ակտիվ դերակատարություն է ունեցել Հայաստանից Անվտանգության քարտուղար Արմեն Գրիգորյանը, որը հայտնի է որպես ամերիկամետ գործիչ և ժամանակին աշխատել է ամերիկյան հայտնի կազմակերպություններից մեկում, որը զբաղվում է ամբողջ աշխարհում կոռուպցիայի դեմ պայքարով։ Ընդ որում, նա այնտեղ հայտնի նախագիծ է ղեկավարել։

«Այդ փաստաթուղթը նախատեսվում է ստորագրել արդեն մինչև տարեվերջ: Նշեմ, թե ստրատեգիական առումով այն ինչ է իրենից ներկայացնում։ Կա մարդ՝ ԱՄՆ կոնգրեսական Ֆրենկ Փալոունի անունով, որը տիկին Փելոսի հետ ժամանել էր Հայաստան։ Նա հայկական Հանրային հեռուստաընկերության եթերում ելույթ ունենալով, ասաց, որ Ռուսաստանը պարտվելու է Ուկրաինայի հետ պատերազմում։ Ընդ որում՝ դա ներշնչում են հայ հասարակության մեջ։ Բացի դա, այդպիսով դրվելու է Ռուսաստանի գոյության հարցը, ինչպես նաև ՌԴ-ն դուրս է գալու տարածաշրջանից։ Բացի այդ, ասում էր, որ ինչ վերաբերում է Թուրքիային, ապա նրանից չպետք է վախենալ։ Այսօրվա թուրքը նման չէ 100 տարի առաջվա թուրքին։ Նրանք փոխվել են, նույն մարդիկ չեն, չպետք է նրանցից վախենալ ու բարեկամանալ Թուրքիայի հետ։ Այդպիսով չի լինի նաև ոչ մի սպառնալիք։ Ինչ վերաբերում է Ադրբեջանին, ապա դա ևս կկարգավորեն։ Հենց այս ֆոնին պետք է դիտարկել այդ՝ վաշինգտոնյան տարբերակը: Այդ տարբերակը ենթադրում է հանձնել Ղարաբաղը։ Այդպիսով Ղարաբաղը համարվում է Ադրբեջանի մաս, իսկ բնակիչները Ադրբեջանի քաղաքացիներ են համարվելու, ինչպես մյուսները։ Որից հետո էլ բարձրանալու է ռուս խաղաղապահների դուրս բերման հարցը»,- նշեց Բաղդասարովը և հավելեց, որ շղթայական շարունակությունն արդեն պարզ է․ ռուսական ռազմաբազան դուրս պետք է գա Գյումրիից և առհասարակ ռուսական բանակը՝ հայ-թուրքական սահմանից։ Եթե չկա Թուրքիայի հետ խնդիր, ապա ինչու պահել ռուսական զորքն այնտեղ: