Հոկտեմբերի 31-ին Փաշինյանը Սոչիում կհանդիպի Ալիևի հետ․ Ալեն Սիմոնյան
«Որևէ փաստաթուղթ, որը դրված է սեղանի վրա, այսօր գոյություն չունի։ Կան հարյուրավոր առաջարկներ, հարյուրավոր տարբերակներ, կարծիքներ, պատկերացումներ, բայց սեղանի վրա փաստաթուղթ գոյություն չունի»։ Այս մասին ԱԺ-ում լրագրողների հետ ճեպազրույցում ասաց ԱԺ նախագահ Ալեն Սիմոնյանը։
Հարցին՝ արևմտյա՞ն, թե՞ ռուսական առաջարկներ են, Ալեն Սիմոնյանն արձագանքեց, որ բոլոր տիպի առաջարկներ էլ կան։
«Նույնիսկ նույն մեր գործընկերների շրջանակում, նույն ՀԱՊԿ-ի շրջանակում, տարբեր պատկերացումներ կան, բայց կա Հայաստանի պատկերացումը, որի մասին Հայաստանի վարչապետը բազմիցս խոսել է»,- ասաց նա։
Արձագանքելով դիտարկմանը, թե խոսք է գնում մինչև տարվերջ խաղաղության պայմանագիր ստորագրելու մասին, Ալեն Սիմոնյանը նշեց, որ «մինչև տարվա վերջ» արտահայտությունը, որպես այդպիսին, համաձայնության հետևանք չէ, վերջնաժամկետ է, որը երկու կողմն էլ, կարելի է ասել, դրա հետ կապված ցանկություններ ունեն։
«Ես էլ եմ ցանկանում հնարավորինս արագ կնքել խաղաղության պայմանագիր։ Եվս մեկ անգամ նշեմ՝ շահարկումների թեմա չդառնա, Հայաստանի 29 800 քմ-ը մեզ համար կարմիր գիծ է և երբեք քննարկման առարկա չի կարող լինել»,- ասաց Սիմոնյանը՝ հավելելով, որ հնարավորինս արագ պետք է խաղաղության պայմանագիր կնքել։
Սիմոնյանը տեղեկացրեց նաև, որ հոկտեմբերի 31-ին Նիկոլ Փաշինյանը կգնա Սոչի։ Հարցին, թե հանդիպում կլինի՞ Իլհամ Ալիևի հետ, նա պատասխանեց․ «Ենթադրում եմ, որ այո»։
