Հայաստանը ստեղծում է պարտավորությունների կատարման իմիտացիա. Ադրբեջանի փոխվարչապետ

Հայաստանում արտատարածքային և տրանսպորտային միջանցք հասկացությունները փոխկապակցված են, թեև դրանք կապված չեն միմյանց հետ, ասել է Ադրբեջանի փոխվարչապետ Շահին Մուստաֆաևը, հաղորդում է APA-ն։

Նա հիշեցրել է, որ տրանսպորտային միջանցքը տրանսպորտային երթուղի է, որն անցնում է մի քանի երկրների տարածքներով։

Անդրադառնալով հայկական կողմի հայտարարություններին, թե  Զանգեզուրի միջանցքը խախտում է Հայաստանի ինքնիշխանությունը, փոխվարչապետը հիշեցրել է, որ Հայաստանի տարածքում տրանսպորտային հաղորդակցությունների վերահսկողությունն իրականացնում է Ռուսաստանի ԱԴԾ սահմանային ծառայությունը։

«Ինչքանով է այս փաստը ոտնահարում ինքնիշխանությունը, հարցը Հայաստանի իշխանությանն է»,- ասաց նա։

Մուստաֆաևը նաև մեկնաբանել է Հայաստանի կառավարության որոշումը Ադրբեջանի հետ սահմանին երեք անցակետերի վերաբերյալ՝ դրանք անվանելով 2020 թվականի նոյեմբերի 10-ի եռակողմ հայտարարությամբ ստանձնած «պարտավորությունների կատարման իմիտացիա»։

«Որովհետև, ըստ մշտադիտարկման արդյունքների, այդ կետերից բխող ճանապարհները, ըստ ռելիեֆի և բնակլիմայական պայմանների, պիտանի չեն Նախիջևանի հետ տրանսպորտային հաղորդակցության համար։ Բացի այդ, որպես կանոն, անցակետերը բացվում են կողմերի համաձայնությամբ, հայելային տարբերակով, Ադրբեջանի հետ այդ հարցում պայմանավորվածություններ չեն եղել»,- ասել է Մուստաֆաևը։