Պետության այս վարքագիծը հարվածեց ոչ թե կոնկրետ անձի, այլ՝ ինստիտուտի. Արթուր Ղամբարյանը՝ Էրիկ Ալեքսանյանի կալանավորման մասին

Այսօր հանդիպել եմ Էրիկ Ալեքսանյանին։ Քննարկում էինք իր կալանքի իրավաչափության հարցը։ Համակողմանի վերլուծության, այդ թվում՝ մեղադրանքի կողմի դիրքերից հանդես գալու արդյունքում հասկացա, որ Էրիկ Ալեքսանյանի նկատմամբ ազատությունից զրկելու հետ կապված խափանման միջոց կիրառելը համաչափ չէ։ Այս մասին ֆեյսբուքյան իր էջում գրել է իրավագիտության դոկտոր, պրոֆեսոր Արթուր Ղամբարյանը։

«Եթե չլիներ այս գործի շուրջ ձևավորված ընդհանուր "մթնոլորտը" և Էրիկի մասնագիտական գործունեությունը, ապա նրա կողմից դատավարական փաստաթուղթ (միջնորդություն) կազմելու և այն դատարան ներկայացնելու ֆոնին, նման ծայրահեղ անհամաչափ միջոց չէր ընտրվի։ Պետության այս վարքագիծը հարվածեց ոչ թե կոնկրետ անձի, այլ՝ ինստիտուտի։
Թերևս սա չէ էականը։

Ճգնաժամային իրավիճակներում, որպես կանոն, մարդու սոցիալականությունը (բարոյականությունը) էապես սահմանափակվում է և առաջին պլան է գալիս բնազդայինը (ցածր մարդկայինը)։

Նույնիսկ այս իրավիճակում վերահաստատվեց, որ Էրիկը պարզապես լավ ընկեր է ․․․»,- գրել է Ղամբարյանը։