Ալրաղացի Լյովիկը դիմել է դատարան. «Ժողովուրդ»

«Ժողովուրդ» թերթը գրում է.

«ԱԺ նախկին պատգամավոր, Ալրաղացի Լյովիկ մականունով հայտնի Լեւոն Սարգսյանը դիմել է ՀՀ վերաքննիչ քրեական դատարան: ArmLur.am-ին հայտնի դարձավ, որ նա պահանջում է, որ դատարանն ամբողջությամբ Լևոն Հրաչյայի Սարգսյանին և Սուրեն Կորյունի Ղազարյանին արդարացնի կամ գործն ուղարկի համապատասխան դատարան՝ նոր քննության, կամ բեկանի 30.06.2022թ. դատավճիռը և Լևոն Սարգսյանի նկատմամբ նշանակի ավելի մեղմ պատիժ:

Հիշեցնենք, որ այս տարվա հունիսի 30-ին Երեւանի ընդհանուր իրավասության դատարանը՝ դատավոր Տաթևիկ Գրիգորյանի նախագահությամբ, Ալրաղացի Լյովիկին՝ Լևոն Սարգսյանին դատապարտեց ազատազրկման՝ 9 տարի ժամկետով: Դատարանն ավելի մեղմ պատիժ սահմանեց, քան պահանջել էր մեղադրող դատախազը: Նա պահանջել էր Լևոն Սարգսյանին դատապարտել 11, իսկ Սուրեն Ղազարյանին՝ 9 տարի ժամկետով ազատազրկման: Պաշտպանության կողմը միջնորդել էր արդարացնել ամբաստանյալներին:

Հիշեցնենք, որ 2018 թվականին ԱԱԾ-ն հայտարարեց, որ ՀՀ մաքսային պետական կոմիտեի նախկին պետ Արմեն Ավետիսյանի առանձնատան վրա ավազակային հարձակման իրական պատվիրատուն հանդիսացել է Լևոն Սարգսյանը: Լևոն Սարգսյանին մեղադրանք էր առաջադրվել ՀՀ քրեական օրենսգրքի 175-րդ հոդվածի 3-րդ մասի 1-ին եւ 2-րդ կետերով, իսկ Սուրեն Ղազարյանին՝ Քրեական օրենսգրքի 175-րդ հոդվածի 3-րդ մասի 1-ին եւ 2-րդ կետերով»:

Առավել մանրամասն՝ թերթի այսօրվա համարում: