Արցախը զիջելով՝ թշնամու զորքերը մոտեցնելու ենք Երևանին. եթե խաղաղության գինը հայրենազրկումն է ու պետականության կորուստը՝ դա խաղաղություն չէ․ Սաղաթելյան

Նիկոլ Փաշինյանը, խաղաղության անվան տակ, երկիրը տանում է նոր կորուստների և կապիտուլյացիայի, եթե ինքը մնա իշխանության, ունենալու ենք և՛ նոր պատերազմ, և՛ նոր կապիտուլյացիա։ Այս մասին ասուլիսի ժամանակ ասաց ԱԺ ընդդիմադիր պատգամավոր, «Դիմադրություն» շարժման համակարգող Իշխան Սաղաթելյանը։

Ըստ նրա` հանրությունը պետք է իմանա, որ սա միայն Արցախի հարցը չէ, Արցախը կորցնելով՝ կորցնելու ենք ամբողջ Հայաստանը։

«Իրենք ասում են՝ եկեք Արցախը տանք, Հայաստանը փրկենք, բայց Արցախը տալով, կորցնելու ենք Հայաստանը։ Առանց Արցախի չկա Հայաստան, առանց Արցախի չի կարող լինել խաղաղություն։ Մենք պետք է Հայաստանի քաղաքացիներին կարողանանք բացատրել, որ սրանք ձեզ խաբելով, բթացնելով, մոլորեցնելով տանում են նոր ցեղասպանության և կոտորածի։ Հիմա մեր գերխնդիրն է հանրությանը բացատրել, որ սա միայն Արցախի հարց չէ»,- նշեց Սաղաթելյանը։

Նրա խոսքով` Քարվաճառում կանգնած զինվորը պաշտպանում էր Վարդենիսը, այսօր ադրբեջանցին հասել է Ջերմուկ, քանի որ տվել են Բերձորը։

«Մենք պետք է հասկանանք, որ Արցախը զիջելով՝ խաղաղություն չենք ունենալու, ուղղակի թշնամու զորքերը, մեր խրամատները մոտեցնելու ենք Երևանին։

Հետևաբար, սա պայքար չէ մենակ Արցախի համար, սա պայքար է առաջին հերթին Հայաստանի համար»,- ասաց Սաղաթելյանը։

Նա նշեց, որ նորմալ է, երբ մարդիկ ձգտում են խաղաղության, բայց այս իշխանության առաջարկածը խաղաղություն չէ, այլ խաղաղության անվան տակ նոր ցեղասպանություն է, ինչն էլ պետք է կարողանալ բացատրել քաղաքացիներին։

«Եթե այդ խաղաղության գինը հայրենազրկումն է ու պետականության կորուստը, դա խաղաղություն չէ»,- ասաց ընդդիմադիր պատգամավորը։

Նրա խոսքով՝ այսօր Հայաստանի ինքնիշխանության գլխավոր սպառնալիքը նստած է կառավարության շենքում, «քանի դեռ դա կա, այո՛, Հայաստանի ինքնիշխանությունն ու տարածքային ամբողջականությունը լրջորեն վտանգի տակ է»։

Սաղաթելյանը հիշեցրեց նաև, որ սեպտեմբերին Նիկոլ Փաշինյանը մի քանի հայտարարություն է ունեցել, որ սեղանի վրա չկա որևէ փաստաթուղթ, բայց վերջին հայտարարությունների ժամանակ ասաց, որ դեռևս սեպտեմբերի սկզբին համաձայնություն է տվել ռուսական կողմի փաստաթղթին։

«Բացի այդ, պարզվել է, որ սեպտեմբերի 7-ի թվագրությամբ գոյություն ունի ամերիկյան տարբերակ։ Մեկ անգամ ևս արձանագրենք, որ սուտ է խոսել։ Այն, որ նայում էր ժողովրդի աչքերին ու ասում էր փաստաթուղթ չկա, խաբել է։ Այդ փաստաթղթերն իր դարակում դրված էր»,- ասաց Սաղաթելյանը։

Անդրադառնալով Փաշինյանի մեկ այլ հայտարարությանը, երբ նա հայտարարել էր, թե կողմ է ռուսական կողմի ներկայացրած առաջարկներին։

«Այդ հայտարարությունը որևէ արժեք չունի, քանի դեռ նա հստակ չի հայտարարում, որ մերժում է այն մյուս տարբերակը, այսինքն՝ տարբերակ, որը սահմանափակում է Արցախի ինքնորշման իրավունքը, առհասարակ Արցախի հարցը։ Քանի դեռ ինքն այդ հայտարարությունը չի արել, մնացածը բառախաղ է՝ հասարակությանը կրկին մոլորեցնելու, միջազգային հանրության հետ գավառական ճարպկությամբ ինչ-որ քաղաքականություն վարելու և մանևրելու փորձեր։ Այսինքն՝ երբ կա սեղանին դրված առաջարկ և Պրահայում դրան համաձայնություն տվել է, որով, ըստ էության Արցախն Ադրբեջանի կազմում է, կամ քանի դեռ պաշտոնապես չի մերժել, այլ տարբերակի նկատմամբ նրա հայտարարություններն ընդամենը կեղծիք են, անարժեք խոսքեր»,- ասաց Իշխան Սաղաթելյանը։