Հակառակորդը 130 քառակուսի կմ և ավելի տարածք է օկուպացրել. ԶՈՒ գլխավոր շտաբի պետ

Եթե հաշվարկները կատարվում են հակառակորդի առաջնագծից մեր համապատասխան խորություններում, որտեղ հակառակորդը հաջողություն է ունեցել և օկուպացրել մեր ինքնիշխան տարածքից, ապա դա կազմում է մոտ 130 և որոշակի ավելի տարածք: Այս մասին ԱԺ-ում լրագրողների հետ զրույցում նշել է ԶՈՒ գլխավոր շտաբի պետ Էդվար Ասրյանը:

«Եթե այդ տարածքների կորուստը հաշվում ենք մեր առաջնագծից խորությամբ, ապա այդ թիվը ավելի քիչ է կազմում: Կա տարածքների մակերեսի հաշվարկման տարբեր մեթոդներ: Հակառակորդի մխրճումը համապատասխան ճակատով և համապատասխան խորությամբ բոլոր ուղղություններում մխրճում չի արձանագրվել: Կան որոշ հատվածներ, որոնց մխրճման վերջավորությունը, գագաթը հասնում է օրինակ, 3,5 կմ: Տեղանքի գոգավորություներից ելնելով այդ հաշվարկները տարբեր մարդկանց կողմից կատարվում են տարբեր ձևով:

Որպեսզի հաշվենք, թե որքան տարածքում է հակառակորդը գտնվում մեր տարածքում, չպետք է հաշվենք իրենց առաջնագիծը, մեր առաջնագիծը, պետք է հաշվի առնենք ՀՀ պետական սահմանը և սահմանային ինչքան կորուստ ունենք:

Կան դիրքեր, որտեղ հակառակորդը գտնվում է մեր պետական սահմանից հետ, կան դիրքեր, որ գտնվում է մեր սահմանից առաջ: Նման դեպքում առաջանում են մակերեսի հաշվարկման տարբերություններ»,-ասել է նա: