Միակ դրական պահը, որ մենք կարող ենք արձանագրել. Արման Աբովյան

Եթե փորձենք վերլուծել Սոչիում կայացած եռակողմ հանդիպման արդյունքները, ապա կարելի է ենթադրել, որ հայկական հասարակության սպասումները կանխատեսելիորեն չարդարացան և այս պարագայում պետք է հասկանալ բանակցող կողմերի ցանկությունների տրամաբանությունը։ Այս մասին ֆեյսբուքյան իր էջում գրել է նախկին պատգամավոր Արման Աբովյանը: 

«Հայկական պատվիրակության մասով կարելի է առհասարակ ոչ մի բան չխոսել, քանզի Հայաստանի իշխանության քայլերը արցախյան հակամարտության վերաբերյալ այնքան անտրամաբանական, աբսուրդային, իրարամերժ և ապաշնորհ բնույթ են կրում, որ կարծես թե իրենք նույնիսկ չեն հասկանում, թե ի վերջո իրենց ուզածն ինչ է։

Ռուսների համար շատ կարևոր էր ֆիքսել իրենց ռազմական ներկայությունը Արցախի Հանրապետությունում, որպես անփոխարինելի և պարտադիր պայման փխրուն կայունությունը պահպանելու համար։

Իսկ դե ադրբեջանցիների համար կարևոր էր թույլ չտալ, որ արցախյան հարցը բանակցային  օրակարգ վերադառնա։

Դատելով հանդիպման արդյունքում համատեղ հայտարարության տեքստից, կարելի է միանշանակ փաստել, որ, ըստ էության, կողմերը մնացին նույն դիրքերին, ինչը ֆիսքել էին բանակցություններից առաջ։

Ոչ մի կոնկրետություն՝ բացի ընդհանուր խոսքերից։

Ակնհայտ էր, որ ռուսական կողմի համար շատ կարևոր էր ևս մեկ անգամ վերահաստատել իրենց դերը, որպես առանցքային ուժային կենտրոն մեր տարածաշրջանում և կարծում եմ, որ հենց այս միտքը՝ այս կամ այլ ձևաչափով «բացատրում» էր Ալիևին և Փաշինյանին Պուտինը։

Այսինքն, հասկանալի է, որ ռուսների համար չափազանց մտահոգիչ էին Ալիև/Փաշինյան արևմտամետ «խաղերը» (ինչը ուղղակի հաստատեց Պուտինը՝ հանդիպումից հետո մամլո ասուլիսի ժամանակ):

Բայց մեր համար ավելի կարևոր է հասկանալ, թե դեպի ուր է շարժվելու իրավիճակը։
Ըստ էության, միակ դրական պահը, որ մենք կարող ենք արձանագրել այն է, որ մենք ստացանք մի քիչ ժամանակ նոր, անխուսափելի ադրբեջանական ագրեսիային նախապատրաստվելու համար։ Նաև կարելի է ենթադրել, որ ռուսները որոշել են դուրս գալ «ուժեղ» դիտորդի կարգավիճակից և անցնել ավելի շոշափելի քայլերի տրամաբանությանը, ինչը իհարկե բխում է մեր շահերից։

Վատ լուրն այն է, որ մենք չգիտենք, թե որքան ժամանակ ունենք մինչև թուրք-ադրբեջանական ոհմակի նոր սադրանքների մեկնարկը։ Իսկ այն, որ Ալիևը միտումնավոր  գնալու է իրավիճակի կտրուկ սրման ճանապարհով, արդեն իսկ հասկանալի է...»: