Պետք է ապրենք՝ հաշվի առնելով այս նոր, նորմալ իրավիճակը․ կրակոցների միջավայրում պետք է կարողանանք երկիրը դարձնել ավելի ապահով․ Քերոբյան (տեսանյութ)

«Պետք է ապրենք՝ հաշվի առնելով այս նոր, նորմալ իրավիճակը»։ Այս մասին Ազգային ժողովում լրագրողների հետ զրուցում ասաց Էկոնոմիկայի նախարար Վահան Քերոբյանը՝ անդրադառնալով Ջերմուկում տեղի ունեցած ադրբեջանական վերջին ագրեսիային և դրա հետևանքով տուրիզմին հասցված վնասներին։

«Իհարկե, Կառավարությունը և մենք ամեն ինչ անում ենք, որպեսզի անվտանգային միջավայրն օրըստօրե բարելավվի, բայց պետք է նաև ի նկատի ունենալ, որ մենք հիմա ապրում ենք նոր նորմալ միջավայրում, որտեղ ամեն օր կարող է ինչ-որ բան տեղի ունենալ»,-ասաց Քերոբյանը։

Լրագրողի ճշտող հարցին, թե ամենօրյա կրակոցը ձեզ համար դարձել է նորմա՞լ, Էկոնոմիկայի նախարարը հարցով արձագանքեց․ «Իսկ ձեր համար չի՞ դարձել նորմալ բան։ Կրակոցը նորմալ բան է նույնիսկ Իսրայելում, և այդ տնտեսությունը զարգանում է շատ բարձր տեմպերով, և եթե այդ կրակոցը չպետք է լինի մեր երկրի սուվերենության հաշվին, ապա մենք պետք է փորձենք այնպես անել, որպեսզի կրակոցների միջավայրում կարողանանք զարգացնել մեր տնտեսությունը և մեր երկիրն օրեցօր դարձնել ավելի ապահով»։