Բոլոր գյուղացիական տնտեսությունները պետք է գրանցվեն և իրականացնեն հաշվառում, որը հետագայում կենթադրի հարկեր․ Քերոբյան (տեսանյութ)

Գյուղատնտեսության ոլորտում առաջին 9 ամիսների անկումը շատ աննշան է՝ 0,1 տոկոս, որովհետև 99,9 տոկոս է եղել տնտեսական ակտիվության ցուցանիշը առաջին 9 ամիսներին: Այս մասին լրագրողների հետ զրույցում ասաց Էկոնոմիկայի նախարար Վահան Քերոբյանը։

Նա վստահեցնում է, որ տարեվերջին անպայման դրական ցուցանիշ կլինի։

«Մենք կարծում ենք, որ գյուղատնտեսության վիճակագրությունը կարիք ունի կտրուկ բարելավման: Խնդրի լուծումը պետք է լինի գյուղատնտեսության թվայնացումը և մասսայական հաշվառումը: Այսօր թե ով է զբաղվում գյուղատնտեսությամբ ու ինչ է արտադրում, կա միայն գնահատական, չկա վիճակագրություն»,- ասաց նախարարը:

Նրա հաշվարկներով, գյուղատնտեսության մասին օրենքի հաստատումը թույլ կտա, որ ֆերմերային տնտեսությունները, ընկերությունները գրանցվեն որպես այդպիսիք, իրականացնեն հաշվառում:

Լրագրողի ճշտող հարցին, թե արդյոք այդ հաշվառումը ենթադրելո՞ւ է հարկային պարտավորություններ գյուղացիների կողմից, նախարարը պատասխանեց. «Այս պահին ոչ, բայց սուբսիդավորման ծրագրերում ընդգրկվելու համար անպայման կլինի հաշվառված լինելը որպես ֆերմերային տնտեսություն: Մենք գնում ենք նրան, որ այն մարդիկ, որոնք ինչ-որ բան արտադրում են, այդ մասին հայտնեն»: