Օտարերկրացիների ցանկացած միջամտություն տարածաշրջանում խնդիրներ կստեղծի, ոչ թե խնդիրը կլուծի․ Իրանի նախագահը՝ Փաշինյանին

Թեհրան այցելած Նիկոլ Փաշինյանը մասնակցել է Իրանի նախագահ Իբրահիմ Ռաիսիի հետ համատեղ համաժողովին։ Այս մասին գրում Mehrnews.com-ը՝ հղում տալով Իրանի նախագահի մամուլի հաղորդագրությանը։

Ռաիսին մասնավորապես նշել է, որ կովկասյան տարածաշրջանի զարգացումը, անվտանգությունն ու խաղաղությունը շատ կարևոր են Իրանի համար։ Տարածաշրջանային խնդիրները պետք է լուծեն տարածաշրջանային դերակատարները։

«Օտարերկրացիների ցանկացած միջամտություն տարածաշրջանում՝ խնդիրներ կստեղծի, ոչ թե խնդիրը կլուծի»,- ասել է Իրանի նախագահը։ 

Հայաստանի վարչապետն իր հերթին բարձր է գնահատել նախագահ Ռաիսիի վերաբերմունքն Իրանի հայ համայնքի նկատմամբ։ 

«Իրանի Իսլամական Հանրապետությունը կարող է լինել տարբեր կրոնների հետևորդների խաղաղ համագործակցության և համակեցության հստակ և բացահայտ խորհրդանիշ»,- ասել է Նիկոլ Փաշինյանը։

Վերջինս բարձր գնահատելով Իրանի սկզբունքային տեսակետները կովկասյան տարածաշրջանում խաղաղության և անվտանգության վերաբերյալ՝ նաև ասել է. «Ես պարոն Ռաիսիին տեղեկացրել եմ Սոչիում կայացած եռակողմ հանդիպման մասին և համաձայն եմ Իրանի նախագահի կարծիքին տարածաշրջանում կայուն խաղաղության և անվտանգության հաստատման վերաբերյալ»։

Նա նաև տեղեկացրել է, որ Իրանի և Հայաստանի նախարարները փոխըմբռնման հուշագիր են ստորագրել էլեկտրաէներգիայի և գազի վերաբերյալ համաձայնագրի երկարաձգման վերաբերյալ։ Որոշ քննարկումներ են տեղի ունեցել էներգետիկայի և գյուղատնտեսության, ենթակառուցվածքների և ջրային տնտեսության ոլորտներում։

Փաշինյանը նաև հրավիրել է Իրանի նախագահին այցելել Երևան՝ շարունակելու այս բանակցությունները։