Յուրաքանչյուր լարվածություն Իրանի ուղղությամբ, անմիջապես բերելու է թուրք-ադրբեջանական ոհմակի ակտիվացմանը հայկական ուղղությամբ. Արման Աբովյան

Մի քիչ կտրվենք ներհայաստանյան խնդիրներից, քանզի բավական լուրջ իրավիճակ է գեներացվում մեր հարևանությամբ, որն իր հերթին կարող է ուղիղ անդրադառնալ Հայաստանի և Արցախի շուրջ տեղի ունեցող գործընթացներին։ Այս մասին ֆեյսբուքյան իր էջում գրել է նախկին պատգամավոր Արման Աբովյանը:

«Խոսքը կրկին Իրանի մասին է, ավելի ճիշտ` նոր բացասական զարգացումների մասին իրանական ուղղությամբ։ Բացի իրանական ներքին խռովությունների արդյունքում ձեւավորվող ռիսկերը` իրավիճակը Իրանի արտաքին ճակատում ունի կտրուկ սրվելու միտում։

Խոսքը մի կողմից Սաուդյան Արաբիայի/Իսրայելի և մյուս կողմից Իրանի միջև ռազմական բախման հնարավորության մասին է։

Հիշեցնեմ, որ երեկ Սաուդյան Արաբիայի ղեկավարությունը շտապ դիմել է Միացյալ Նահանգներին` առաջարկելով ցուցաբերել իրենց (սաուդիտներին) ռազմական օգնություն, քանզի Իրանը, ըստ սաուդիտների հետախուզության տվյալների, նախապատրաստվում է հարվածել թագավորության նավթա-գազային արդյունաբերական կենտրոններին։

Իր հերթին Իսրայելի ողջ տարածքում ՀՕՊ ստորաբաժանումները բերվել են բարձր պատրաստականության վիճակի։

Հիշեցնեմ նաև, որ երկու շաբաթ առաջ Իրանում սպանվել են Իրանի ԻՀՊԿ-ի երկու բարձրաստիճան զինվորական և Իրանը ուղիղ մեղադրել է սպանության մեջ սաուդիտներին և իսրայելցիներին։

Ասեմ ավելին, իրանցիները արդեն խոստացել են լայնածավալ գործողություններով պատասխանել «մեղավորներին»։

Այս պարագայում մեզ համար չափազանց կարեւոր է հասկանալ, որ յուրաքանչյուր լարվածություն Իրանի ուղղությամբ, որը կարող է շեղել կամ թուլացնել Իրանի հետաքրքրությունները Հարավային Կովկասում, անմիջապես բերելու է թուրք-ադրբեջանական ոհմակի ակտիվացմանը հայկական ուղղությամբ, բոլոր բացասական հետևանքներով հանդերձ։ Կարծում եմ բացատրել ռիսկերի էությունը կարիք չկա, բոլորը հասկանում են»։