Չեմ բացառում, որ մուտքագրողը հոգնած է եղել ու մկնիկը մի հատ վերև մի հատ ներքև է արել․ Պապոյանը՝ ՔՊ վարչության ընտրությունը կեղծելու մասին (տեսանյութ)
ՔՊ-ական պատգամավոր Գևորգ Պապոյանը նորմալ է համարում այն, որ ՔՊ վարչության ընտրությունների վերահաշվարկի արդյունքում ձայների տարբերություն է եղել այն աստիճան, որ դրանից հետո վարչության կազմը փոխվել է։
Նա համաձայն չէ այն դիտարկմանը, որ այդ ձայների տարբերությունը եղել է ընտրությունները կեղծելու պատճառով։
«Էհ, դե լավ էլի, էդպիսի բան չի կարող տեղի ունենալ։ Նման գնահատական ես չէի հնչեցնի ու վերահաշվարկող հանձնաժողովը ևս նման տեսակետ չի հնչեցրել»,-լրագրողների հետ զրույցում ասաց Պապոյանը։
Այդ դեպքում, ինչո՞ւ վերահաշվարկի կարիք առաջացավ և ո՞ւմ առաջարկով հարցին. Պապոյանը հստակ չպատասխանեց՝ չգիտի։ Դիտարկմանը, թե Արսեն Թոորոսյանի անունն է հիշատակվում, նա ասաց․ «Վստահ չեմ, միգուցե»։
Նա չի բացառում, որ պարզապես մուտքագրողի սխալն է եղել, քանի որ հնարավոր է նա հոգնած է եղել։
«Չեմ բացառում, որ մարդը հոգնած է եղել՝ մի հատ վերև, մի հատ ներքև է կարդացել, կամ մուտքագրողը հոգնած է եղել, մկնիկը մի հատ վերև, մի հատ ներքև է արել։ Ես կարծում եմ՝ այդպիսի սխալներ են տեղի ունեցել, իսկ վերահաշվարկի ժամանակ շատ ավելի ուշադիր, դանդաղ ու ավելի շատ մարդկանցով է հաշվարկը տեղի ունեցել՝ փորձելով բացառել սխալները»,- ասաց պատգամավորը։
Նա ոչ մի լուրջ բան չի տեսնում ու, ըստ նրա, վերահաշվարկն էլ հենց նրա համար է, որ այդ սխալներն ուղղեն։
«Խմբակցության ղեկավարի ձայները կարծեմ չի փոխվել, կամ 1-2-ով ավելացել, կամ պակասել է: Ձայներն իրար այնքան մոտ են, 4-5 ձայն ավել կամ պակաս են: Եթե մեկի ձայնը 2-ով ավելացել է, մյուսինն էլ 1-ով պակասել է, այդտեղ փոփոխություն է տեղի ունենում: Իմ ձայներն էլ են ավելացել: Այդքանի մեջ, պայմանական ասած, 30 տոկոսի ձայները մնացել են նույնը, 30 տոկոսինը օրինակ 3-4 ով ավելացել է, մի 30 տոկոսինն էլ 3-4-ով պակասել է, սրանք միջինացված եմ ասում»,- նշեց Պապոյանը՝ հավելելով, որ ամեն դեպքում ինքը որևէ դիտավորություն չի տեսնում։
