Ընտրակեղծարարները կպատժվե՞ն, թե՞ անպատժելիությունը ՔՊ վարչություն էլ է սողոսկել. «Հրապարակ»

«Հրապարակ» թերթը գրում է.

«Ինչպեսև սպասվում էր՝ ՔՊ-ում փորձելու են ծածկադմփոց անել վարչության ընտրությունների հետ կապված կեղծիքը՝ հանրության աչքին թոզ փչելով, թե կատարվածը տեխնիկական անփութության հետեւանքով է։  

Նախօրեի ուշ երեկոյան Նիկոլ Փաշինյանի մոտ նորընտիր վարչության կազմով քննարկումից հետո երեկ առավոտյան կուսակցությունը հայտարարություն տարածեց վարչության կազմի փոփոխության մասին, համաձայն որի` ԱԺ ՔՊ խմբակցության ղեկավար Հայկ Կոնջորյանը, փոխվարչապետ Համբարձում Մաթեւոսյանը վերահաշվարկի եւ «ճշգրտումների» արդյունքում դուրս են մնացել վարչության կազմից՝ իրենց տեղը զիջելով պատգամավոր Արսեն Թորոսյանին եւ ԱԻ նախարար Արմեն Փամբուխչյանին։ Նորընտիր վարչության անդամ Գևորգ Պապոյանն ասել էր, թե խոսք չի կարող լինել միտումնավոր կեղծիքի մասին, նորմալ է, որ վերահաշվարկի արդյունքում «մեկի ձայնը երկուսով ավելացել կամ երեքով պակասել է»: Իբրև թե «մի հատ վերեւ կամ ներքեւ են կարդացել, կամ մուտքագրողը հոգնած է եղել՝ մկնիկը վերև-ներքև է արել»: Մինչդեռ խոսքը ոչ թե մեկ-երկու ձայն վերեւ-ներքեւ տանելու, այլ տասնյակ ձայների կեղծման մասին է: Օրինակ, պարզվել է, որ Համբարձում Մաթևոսյանը ստացել է 391 քվե, մինչդեռ համագումարից հետո ասել էին 418, Վիլեն Գաբրիելյանին հավելագրել էին 40, Տրդատ Սարգսյանին՝ 30 ձայն, և սա վկայում է միտումնավոր զեղծարարության մասին։

Մեզ ասացին, որ նորընտիր վարչության հետ նախօրեի հանդիպմանը Փաշինյանն ասել է, որ վարչության կազմը պետք է փոխվի, մնացած հարցերին կանդրադառնան առաջիկայում, քանի որ հարցեր կան պարզելու։ ՔՊ-ի ներսում վրդովված են տեղի ունեցածից։ Պատգամավորներից մեկը մասնավոր զրույցում ասաց, որ գուցե հանրությունից թաքցնեն կատարվածն ու փորձեն ծածկադմփոց անել,  բայց թիմից չեն կարող․ «Փաստն այն է, որ պատը ճաք է տվել, հիմա ինչքան էլ սվաղեն, ինչ-որ ժամանակ հետո այդ ճաքը զգացնել է տալու, ուստի պետք է պատը հիմնովին վերանորոգեն»։ Մեկ ուրիշն ասաց․ «Զուռնայի ձենը շուտով կլսվի», և վստահություն հայտնեց, որ Նիկոլ Փաշինյանն անհետեւանք չի թողնի սա, քանի որ խնդիրը միայն ընտրությունները կեղծելու մեջ չէ, կան ավելի խորքային գործընթացներ։

Բանն այն է, որ չնայած համագումարի կազմակերպիչը և կատարվածի համակարգողն ԱԺ պատգամավոր Արփի Դավոյանն էր, և նրա անմիջական կազմակերպմամբ են տեղի ունեցել այս զեղծարարությունները, սակայն Դավոյանը միայնակ նման բան չէր անի, դա կատարվել է պաշտպանության նախարար Սուրեն Պապիկյանի քավորությամբ, եւ ձայների հավելագրումներն էլ արվել են հիմնականում Պապիկյանի մերձավորներին: Գաղտնիք չէ, որ վերջինս հավակնում է դառնալ Նիկոլ Փաշինյանի իրավահաջորդը եւ բոլոր ոլորտներում ու կառույցներում իր մարդկանց է ներդնում: Դա է պատճառը, որ ստեփանավանցիների տեսակարար կշիռն ու ազդեցությունը երկրում աճ է ապրել:  Թիմում գիտեին, որ համագումարից եւ ընտրություններից առաջ շատ ակտիվ աշխատանքներ են տարել Սուրեն Պապիկյանը, նրա ազդեցության տակ գտնվող նախկին մարզպետները, ովքեր այժմ կառավարության անդամներ են` Գնել Սանոսյանը, Համբարձում Մաթեւոսյանը, Ռոմանոս Պետրոսյանը, Տրդատ Սարգսյանը։ Համբարձում Մաթեւոսյանը հենց Պապիկյանի պասով է փոխվարչապետ դարձել, Տրդատ Սարգսյանը ստվերի պես հետեւում է Պապիկյանին: Նրանք նախ աշխատել են համագումարի պատվիրակների ընտրության ժամանակ` ամեն ինչ արել են, որ իրենց մտերիմները դառնան ընտրիչներ: 

ՔՊ ակտիվների այս խումբն «աշխատել» է հաշվիչ հանձնաժողովի հետ, որտեղ ընդգրկված են եղել պատգամավորների նախկին օգնականներ, ԱԺ փորձագետներ, ովքեր կառավարվել են այս խմբակի կողմից։ 

Մեզ պատմեցին նաև, որ այս խմբի կողմից յուրային պատվիրակներին նախընտրելի 15 թեկնածուների ցուցակ է բաժանվել, ինչպես նաեւ՝ «սեւ ցուցակ», թե հատկապես որ ՔՊ-ականների օգտին պետք չէ քվեարկել։

«Սև ցուցակում» են եղել ԱԺ նախագահ Ալեն Սիմոնյանը, Արսեն Թորոսյանը, Մարիա Կարապետյանը, Արմեն Գրիգորյանը, եւս մի քանի անուն։ Համագումարի կազմակերպչական թիմը նախապես Նիկոլ Փաշինյանին վստահեցրել է, որ հաշվի են առնվել կուսակիցների բոլոր դիտողություն-առաջարկները՝ հնարավորինս արդար-թափանցիկ ընտրություններ անցկացնելու համար համապատասխան մեխանիզմներ գործադրելու հարցում, սակայն հետագայում պարզվել է, որ ո՛չ թեկնածուների վստահված անձինք են հաշվարկին մասնակցել, ո՛չ էլ քվեաթերթիկները հաշվարկելիս թերթիկներն այնպես են պահել, որ մոնիթորի առջեւ հետեւող կուսակից ընկերներին տեսանելի լինի, թե ում անունն է այնտեղ գրված։

Վերադառնալով վերահաշվարկին՝ ո՛չ ՔՊ կանոնադրությունը, ո՛չ էլ «Կուսակցությունների մասին» օրենքը ներկուսակցական ընտրությունների բողոքարկման մեխանիզմ չի սահմանում: Եվ ոչ մեկը չի ենթադրել, որ որեւէ մեկն այդ զեղծարարությունը կբացահայտի եւ որեւէ մեկը կպահանջի վերահաշվարկ անել: Բայց այդպես մտածողները հաշվի չէին առել, որ կա Արսեն Թորոսյանի ֆենոմենը, ով վստահ է եղել, որ ինքը բավարար ձայներ է ստացել, ուստի հենց առաջին պահից սկսել է բողոքել: Եվ կլինի «Հրապարակի» նման մի լրատվամիջոց, որը ՔՊ խոհանոցից լուրը կստանա եւ թեման կդնի շրջանառության մեջ»: