Հարություն Մերդինյանը դարձավ աշխարհի կրկնակի բրոնզե մեդալակիր (տեսանյութ)

Հայաստանի հավաքականի առաջատարներից Հարություն Մերդինյանը երկրորդ անգամ դարձավ աշխարհի բրոնզե մեդալակիր: Լիվերպուլում ընթացող սպորտային մարմնամարզության նժույգ թափեր վարժության եզրափակիչում Եվրոպայի կրկնակի չեմպիոնն ամենավերջինը դուրս եկավ մրցահարթակ և14.733 միավորով նվաճեց բրոնզե մեդալ:

Sport.news.am-ի փոխանցմամբ՝ առաջին անգամ Մերդինյանը աշխարհի առաջնությունում բրոնզե մեդալակիր էր դարձել 2015 թվականի հոկտեմբերի 31-ին Շոտլանդիայի Գլազգո քաղաքում:

Հայաստանի հավաքականի առաջատարը օգոստոսին Գերմանիայի Մյունխեն քաղաքում նժույգ թափերում երկրորդ անգամ հռչակվեց Եվրոպայի չեմպիոն: Առաջին անգամ չեմպիոնի կոչումը նվաճել է 2016 թվականի մայիսի 29-ին Շվեյցարիայի Բերն քաղաքում տեղի ունեցած Եվրոպայի առաջնությունում:

Արդյունքների ամփոփումից և բրոնզե մեդալակիր դառնալուց հետո ուղիղ եթերում Հարություն Մերդինյանը ուղիղ եթերից իր անձնական մարզիչ Սոս Սարգսյանին շնորհավորեց ծննդյան առթիվ:

Որակավորման փուլում Մերդինյանը վաստակել էր 14.700 միավոր և 5-րդ տեղով էր դուրս եկել եզրափակիչ:

Քիչ անց կմեկնարկի օղակների վարժության եզրափակիչը, որտեղ Հակոբ Սերոբյանի գլխավորած հավաքականն ունի երկու մասնակից: Մեդալների համար կպայքարեն Եվրոպայի փոխչեմպիոն, աշխարհի գավաթակիր Վահագն Դավթյանը և աշխարհի գավաթի արծաթե մեդալակիր, Համաշխարհային ուսանողական խաղերի չեմպիոն Արթուր Ավետիսյանը:

Վահագն Դավթյանը որակավորման փուլում վաստակել է 14.566 միավոր։ Նա նույնպես 5-րդ տեղից է դուրս եկել եզրափակիչ, Արթուր Ավետիսյանը՝ 14.466 միավորով 7-րդն է։

Տոկիոյի Օլիմպիական խաղերի բրոնզե մեդալակիր, Եվրոպայի չեմպիոն Արթուր Դավթյանը, որն առաջին տեղով է դուրս եկել հենացատկի վարժության եզրափակիչ, աշխարհի առաջնության ոսկե մեդալի համար կպայքարի նոյեմբերի 6-ին: