Չեմ կարծում, որ 2023-ին սկսվի մետրոյի նոր կայարանի կառուցումը. ֆինանսավորման աղբյուրները ևս պարզ չեն․ քաղաքապետ
Աջափնյակի մետրոյի նախագծման աշխատանքներն ընթացքի մեջ են։ ԱԺ ճեպազրույցում ասաց Երևանի քաղաքապետ Հրաչյա Սարգսյանը՝ տեղեկացնելով նաև, որ արդեն տեղի է ունենում առաջին փուլի հանձնման-ընդունման գործընթացը, իսկ նախագծման վերջնական փուլը պատրաստ կլինի հաջորդ տարի հունիս-հուլիսին ամիսներին, որից հետո կհայտարարվի մրցույթ:
Ճշտող հարցին, թե արդյոք հաջորդ տարվանից կմեկնարկե՞ն շինարարական աշխատանքները, թե՞ ոչ, քաղաքապետը պատասխանեց․ «Չեմ կարծում, որ 2023 թվականին սկսվի կառուցումը։ Դա պրոցես է, որն անցնելուց հետո միայն կհայտարարվի շինարարության մրցույթ»։
Դրանից բացի, դեռևս որոշված չէ, թե ինչ աղբյուրներից պետք է ֆինանսավորվի շինարարությունը։ Հրաչյա Սարգսյանի կարծիքով՝ ֆինանսավորումը կիրականացվի միջազգային կազմակերպությունների միջոցով։
Մեկ այլ հարցի, թե իսկ հնարավո՞ր է 10 տարուց սկսեն կառուցել, Երևանի քաղաքապետը պատասխանեց. «Չասեմ, թե երբ կարող ենք կառուցել, բայց ասեմ, որ գործընթացը գնում է, Երևանի բյուջեից արդեն 800 միլիոն դրամ է հատկացվել նախագծման աշխատանքները սկսելու համար, 2023 թվականին բյուջեով նախատեսված է 1 միլիարդ 100 միլիոն նախագծման աշխատանքների համար, որից հետո կսկսեն աշխատանքները»։
