Ջերմուկից կարելի է անզեն աչքով տեսնել սահմանում կանգնած ադրբեջանցի զինվորներին (տեսանյութ)

Ցանկացած ֆորմատով կարելի է գնալ խաղաղության, կարևորը՝ կամքն է, որ խաղաղություն լինի։ Այս մասին լրագրողների հետ զրույցում ասաց ՔՊ-ական պատգամավոր Արմեն Խաչատրյանը։

Դիտարկմանը, թե Հայաստանը պահանջ չի դնում, որ Ադրբեջանը հանի իր զորքը ՀՀ սուվերեն տարածքից, որից հետո միայն կարելի է խոսել «խաղաղության պայմանագրի» մասին, ՔՊ-ական պատգամավորը պատասխանեց, որ խաղաղության օրակարգն ինքնին ենթադրում է, որ այդ պահանջը դրված է։

«Խաղաղության այն ձևաչափը, որ մենք ենք պատկերացնում, կարծում եմ, Ադրբեջանը կողմ չի դրան։ Կարծում եմ՝ Ադրբեջանն ամեն կերպ պետք է սադրի ու վիժեցնի գործընթացը։ Հայաստանը կփորձի միջազգային ճնշումների ներքո բերել խաղաղության, թե չէ եթե մնաց Ադրբեջանին, ապա նա չի գնա խաղաղության»,- ասաց Արմեն Խաչատրյանը։

Անդրադառնալով այն դիտարկմանը, որ Ջերմուկի որոշ տարածքներից արդեն պարզ երևում է հայ-ադրբեջանական սահմանը, ՔՊ-ականը հանգիստ հաստատեց, որ, այո՛, կան տարածքներ, որտեղից արդեն պարզ կարելի է տեսնել սահմանը, և այն, թե ինչ ինժեներական աշխատանքեր են իրականացնում ադրբեջանցիները։

«Ե՛վ Ջերմուկից կարելի է տեսնել, և՛ Խոզնավարում, որտեղ ադրբեջանցի զինվորներն իրենց դեմքով երևում են։ Ջերմուկից ևս անզեն աչքով կարելի է տեսնել նրանց դիրքերը, իսկ Խոզնավարում տեղ ունենք, որտեղ դիրքերի տարբերությունը մի քանի մետր է, զինվորների դեմքերը երևում են»,- ասաց Խաչատրյանը։

Անդրադառնալով Բերձորում Ադրբեջանի կողմից ռազմաբազա կառուցելուն և հնարավոր սպառնալիքներին, Խաչատրյանն ասաց․

«Սպառնալիքներ միշտ էլ կան, Ադրբեջանն այսօր այնպիսի ռազմական առավելություն ունի, որ արդեն սպառնալիք է ՀՀ-ի համար, ռազմաբազայի կառուցումը մեծ բան չի փոխում, ռազմական հավասարակշռությունն ի սկզբանե խախտված է»։

Արմեն Խաչատրյանը նկատեց, որ հայ-ադրբեջանական սահմանին դիտորդական առաքելություն իրականացնող ԵՄ դիտորդներն արձանագրել են, որ Ադրբեջանի կողմից օկուպացիա է եղել, ինչը կունենա իրավական հետևանք։