Որտե՞ղ են Արցախի և Հայաստանի ԱԳՆ-ների խստորեն դատապարտող հայտարարությունները

Կոպտորեն խախտելով «Արցախի Հանրապետության բռնազավթված տարածքների մասին» Արցախի Հանրապետության 2022թ. փետրվարի 18-ի օրենքը՝ օկուպանտ Ադրբեջանի սուլթան Իլհամ Ալիևը, առանց Արցախի Հանրապետության վարչակազմի գրավոր թույլտվության, 2022թ. նոյեմբերի 8-ին այցելել է ադրբեջանական զինված կազմավորման ստորաբաժանումների կողմից օկուպացված Արցախի Հանրապետության սահմանադրորեն ամրագրված տարածք՝ քաղաք Շուշի, որտեղ կրկին հոխորտացել է Արցախի և Հայաստանի հանրապետությունների հասցեին: Այս մասին ֆեյսբուքյան իր էջում գրել է քաղաքագետ Ստեփան Հալալ-Ջալալյանը:

«Վերոնշյալ այցից անցել է երկու օր, որտե՞ղ են Արցախի և Հայաստանի հանրապետությունների արտաքին գործերի նախարարությունների՝ նշված այցը խստորեն դատապարտող հայտարարությունները:

16 տարիներ շարունակ (2003-2019թթ.) օկուպանտ Ադրբեջանի սուլթան Իլհամ Ալիևը գրեթե ամեն Աստծո օր մի առիթ գտնում էր հայերին անվանելու օկուպանտ, հայտարարելու իբրև թե իրենց «պատկանող» այս կամ այն տարածք հայերի այցելության մասին: Կյանքը ցույց տվեց, որ այդ մոտեցումն արդարացրեց իրեն:

Առանց Արցախի Հանրապետության վարչակազմի գրավոր թույլտվության օկուպանտ Ադրբեջանի ցանկացած ներկայացուցչի յուրաքանչյուր այցելություն Արցախի Հանրապետության սահմանադրորեն ամրագրված, օկուպացված տարածքներ պետք է արձանագրել և այդ մասին հանդես գալ խստորեն դատապարտող հայտարարություններով»: