Տեսնում ենք ոչ միայն Էրդողանի բերանից արտասանված հակահայկական թեզեր, այլ այդ թեզերի տիրաժավորում՝ հասարակության լայն շրջանակում. թյուրքագետ

Թուրքիայում հակահայկականությունը ոչ թե նվազել է, այլ՝ աննախադեպ ծավալներով ավելացել: Թյուրքագիտական երկու նոր գրքերի շնորհանդեսին ասաց թյուրքագետ Վարուժան Գեղամյանը:

«2019 թվականի ապրիլի 24-ին մենք ունենում ենք ոչ թե ելույթ, որտեղ խոսվում է Հայաստանի ու հայության դեմ ուղղված մեղադրանքների մասին ու փաստացի հայտարարվում է արցախյան գալիք պատերազմում Թուրքիայի մասնակցության հիմնավորման մասին: Այդ ելույթից հետո թուրքագետներս բարձրաձայնեցինք սրա մասին հնարավոր բոլոր ձևաչափերով՝ թե՛ մամուլում, թե՛ փակ հանդիպումներով, բայց, որպես կանոն, մենք ստացանք պատասխանը, թե մենք էլի ընկել ենք պատմության գիրկը և դա իրականության հետ կապ չունի», - ասաց Վարուժան Գեղամյանը:

Գեղամյանի խոսքով` 2020 թվականի պատերազմից հետո, երբ ակնհայտ դարձավ Թուրքիայի մասնակցությունը պատերազմին ոչ թե միջնորդավորված է, այլ՝ ուղիղ, դրանից հետո սկսեցին ակտիվ քարոզել, թե Հայաստանում իրենք են հրահրում թշնամանք թուրքերի նկատմամբ:

«Մենք տեսնում ենք ոչ միայն Էրդողանի բերանից արտասանված հակահայկական թեզեր, այլ, ըստ էության, այդ թեզերի տիրաժավորում՝ հասարակության լայն շրջանակում: Թուրքիայում չեն աջակցում Հայաստանի հետ խաղաղության հասնելու օրակարգին: Մեզ ասում են, որ մենք թուրքագետ չենք, այլ թուրքատյաց ենք, փաստորեն, մեզնից պահանջում են, որ մենք ոչ միայն դավաճանենք հայրենիքը, այլ նաև՝ գիտությանը, որովհետև գիտությունը մեզ ապացուցում է, որ ունենք պետություն, որը հակահայկական է թե՛ իր պետական հռետորաբանությամբ, թե՛ իրականացրած քայլերով», - հայտարարեց թուրքագետը: