Այս մտրակը, որն Արցախից եկել է Ջերմուկ, չի կանգնելու, թուրքերի նպատակակետը Երևանն է. հադրութցի

Նիկոլ Փաշինյանը հայտարարեց, որ Ալիևը համաձայն է՝ հադրութեցիները վերադառնան իրենց հայրենիք։ Բայց այնտեղ շեշտվում է՝ միայն հադրութեցիները, ինչո՞ւ շուշեցիներին կամ քարինտակցիներին իրենց քաղաքացի չի համարում։ Այս մասին Ֆրանսիայի դեսպանատան դիմաց լրագրողների հետ զրույցում ասաց «Հանուն Հադրութի» ՀԿ ղեկավար Լևոն Հայրիյանը։

«Եթե Փաշինյանն ասում է, թե Ալիևը պատրաստ է հադրութեցիներին ընդունել որպես Ադրբեջանի քաղաքացի, ինչո՞ւ կոչ չի անում Բաքվի 400 հայից գոնե մեկը վերադառնա Ադրբեջան»,- նկատում է Հայրիյանը։

Նա նկատում է, որ Արցախից տեղահանված ժողովուրդն Ադրբեջանի քաղաքացիներ չեն և ունեն իրենց պետությունը։ Հայրիյանն ընդգծում է, որ իրենք Ադրբեջանի քաղաքացիներ չեն, այլ Արցախի դե ֆակտո կայացած պետության քաղաքացիներ։

«Ադրբեջանի քաղաքացիներն այն մարդիկ են, ովքեր ընդունում են Իլհամ Ալիևի գերակայությունը։ Ես կարող եմ հայտարարել, որ դա Նիկոլ Փաշինյանն է ու իր ՔՊ խմբակը, որոնք ընդունում են Ալիևի գերիշխանությունը։ Եվ մեր նախորդ ցույցի ժամանակ, երբ հայտարարեցի՝ սրանք հրաժարվելու են նաև Հայաստանի անկախությունից, շատերը մտածեցին, որ ես անպատասխանատու հայտարարություն եմ անում։ Հիմա խնդրեմ՝ վերջին ելույթի ժամանակ Նիկոլ Փաշինյանն արդեն Անկախության հռչակագիրն էր քլնգում։ Այսինքն՝ հեռու չէ այն օրը, երբ նրանք կհայտարարեն, թե չեն կարող պահել անկախությունը»,- ասաց Հայրիյանը։

Նա նկատում է, որ իրենք դեմ չեն վերադառնալ Արցախ, բայց իրենց բնակավայրերն այսօր օկուպացված են ադրբեջանցիների կողմից։

«Մենք կվերադառնանք մեր հայրենիք, բայց ազատ, անկախ ու ազատագրված մեր հայրենիք։ Եվ Հայաստանի քաղաքական իշխանությունը պարտավոր է աջակցել Արցախի ինքնորոշմանը։ Պետք է հասկանալ՝ ազատվել Արցախից նշանակում է ունենալ Ջերմուկի իրավիճակ»,- ասաց Հայրիյանը։

Նա նաև կոչով դիմեց հայ հասարակությանը՝ կոչ անելով համախմբվել․ «Այս մտրակը, որն Արցախից եկել է Ջերմուկ, չի կանգնելու, թուրքերի նպատակակետը Երևանն է։ Մեր ղեկավարներն անընդահատ ասում են՝ Ադրբեջանն ուզում է հարձակվել։ Մեզ ինչո՞ւ եք դա ասում, ունենք բանակ, պետություն, եթե պատրաստվելու փոխարեն հայտարարում են, որ Ադրբեջանն էլի է ագրեսիա անելու, նշանակում է՝ մեզ տեռորի են ենթարկում, վախեցնում, որ իրենց նպատակներին հասնեն։ Եթե գիտես, որ Ադրբեջանը հարձակվելու է, երկրի գերագույն գլխավոր հրամանատար, զորք տար այնտեղ, որտեղ հարձակվելու է, զենք գնիր։ Երկիրը չեն կարողանում պահել, բայց իշխանությունից էլ չեն ուզում հրաժարվել։ Ոչ մի երկրում նման բան չկա, որ մի երկրի ղեկավար հայտարարի, որ չի կարողանում այս հարցը լուծի, բայց ձգտի երկրի իշխանությունը ձեռքին պահել։ Ի՞նչ է նշանակում սա, նշանակում է, որ իրենք իրենց օրակարգով չեն շարժվում, իրենց օրակարգը գրվում է ուրիշ տեղ»,- ասաց Հայրիյանը։