Այն բյուջեն, որ բերել են այսօրվա իշխանությունները, հետևյալի մասին է՝ ամեն հաջորդ օր մեր քաղաքացիներն ավելի վատ են ապրելու. Թադևոս Ավետիսյան

«Աշխատանքի և սոցիալական հարցերի նախարարը ֆինանսների նախարարի հետ միասին պետական բյուջեի նախագիծ է մշակել և բերել ԱԺ, որով առաջարկվում է՝ նախարարների աշխատավարձը հաջորդ տարի բարձրացնել 142 հազար դրամով, իրենց ղեկավարի՝ վարչապետի աշխատավարձը` 200 հազար դրամով, իսկ աշխատող աղքատի աշխատավարձը բարձրացնել 7000 դրամով»: Այս մասին ԱԺ ճեպազրույցների ժամանակ ասաց «Հայաստան» խմբակցության պատգամավոր Թադևոս Ավետիսյանը՝ անդրադառնալով 2023 թ. պետական բյուջեի մասին նախագծին։

Նրա գնահատմամբ, ներկայացվածն արդեն իսկ խոսուն ապացույց է այն բանի, որ այս նախագիծը հետևյալի մասին է՝ «ամեն հաջորդ օր մեր քաղաքացիներն ավելի վատ են ապրելու»։

«Իրենք նախագիծը ներկայացնում են փաթեթով, որը բացելու դեպքում, պետք է տեսնենք, որ վարչապետի աշխատավարձը բարձրացել է 20 տոկոսով, շարքային քաղաքացունը՝ 10։ Հիմա դուք ասեք՝ լա՞վ նախագիծ է, թե՞ վատ»,- հարցադրում արեց Թադևոս Ավետիսյանը։

Պատգամավորը հիշեցրեց, որ այս իշխանությունները խոստացել են 2026 թվականին նվազագույն աշխատավարձը դարձնել 85 հազար դրամ, իսկ հաջորդ տարվա համար 75 հազար դրամ են դարձրել։

«Շատ լավ, եթե այս գնաճի տեմպերը շարունակվեն, մեկ անձի մեկ ամսվա նվազագույն սպառողական զամբյուղը 85 հազար դրամ կդառնա հաջորդ տարվա մինչև կեսերը կամ ավարտը։ Այսինքն, մենք խոսում ենք բացարձակ թվերի մասին, բայց դրանք ոչինչ չեն ասում։ Ի վերջո հատկապես աշխատող աղքատների, անապահով խավի գնողունակությունը հարաբերականորեն ավելի արագ է նվազում, քանի որ իրենց եկամուտներն առանց այն էլ չեն հերիքում նվազագույն իրենց կարիքները հոգալու համար»,- ասաց նա։