Ենթադրենք ներդրողը շենքի 50 ընտանիքից 49-ի հետ պայմանավորվեց, ի՞նչ երաշխիք, որ էն մեկն ամբողջ գործընթացը չի կանգնեցնի․ Փաշինյանը՝ հին շենքի տեղում այլ շենք կառուցելու մասին

«Գիտեք, որ հանրապետությունում վթարային շենքերի բավականին լուրջ խնդիր կա»: Այս մասին կառավարության նիստում ասաց Նիկոլ Փաշինյանը, երբ Երևանի փոխքաղաքապետ Տիգրան Ավինյանը տեղեկացրեց, որ Երևանում կա 13 բազմաբնակարան 4-րդ, 100-ից ավելի՝ 3-րդ կարգի վթարային շենքեր:

Ավինյանը նշեց, որ խոշոր կառուցապառողներին առաջարկում են ներգրավվել այս շենքերի բնակիչների հետ բանակցությունների գործընթացում, որպեսզի որոշակի ընդհանուր ստանդարտների պահպանմամբ՝ այդ շենքերի տեղերում այլ շենքեր կառուցվեն։

«Առաջարկվում է նաև այդ ընթացքում լուծել բնակիչների վարձակալության հարցերը և բնակիչների հետ տարբեր տեսակի պայմանավորվածություններ ձեռք բերել, մասնավորապես՝ նոր կառուցվող շենքում նոր բնակարան հատկացնել, այլ տեղում բնակարան հատկացնել, գումար տալ»,- ասաց Ավինյանը:

Նիկոլ Փաշինյանն էլ փորձեց կոնկրետ օրինակներով հասկանալ, թե որքանով է այս առաջարկն իրատեսական։

«Բազմաբնակարան շենք է, ենթադրենք այդ շենքում ապրում է 50 ընտանիք: Ներդրողը կարող է 49 ընտանիքի հետ պայմանավորվել, 50-րդ ընտանիքը, արդեն իմանալով, որ մյուսների հետ բոլոր հարցերը լուծված են, տեսականորեն այնպիսի գերագնահատված, չափազանցված պահանջներ ներկայացնել, որ ամբողջ գործընթացը կանգնի: Կստացվի, որ ներդրողն այն 49 ընտանիքներին ինչ-որ գումարներ վճարելով կամ նրանց համար ինչ-որ պայմաններ ապահովելով, հնարավորություն չունի ներդրում անել: Այսինքն՝ մենք այստեղ պետք է որոշակի սոցիալական երաշխիքներ ստեղծենք, բալանսավորված, որպեսզի և՛ քաղաքացու իրավունքը պահպանվի, և՛ ներդրողի»,-ասաց Փաշինյանը:

Քաղաքաշինության կոմիտեի նախագահ Արմեն Ղուլարյանն էլ նշեց, որ կառավարությունը դեռևս 2021 թ.-ին հաստատել է անբավարար տեխնիկական վիճակում գտնվող բնակարանային ֆոնդի հիմնախնդրի կանոնակարգման հայեցակարգը և դրանից բխող միջոցառումների ծրագիրը:

«Հայեցակարգի հիմնական նպատակն անբավարար տեխնիկական վիճակում գտնվող բնակֆոնդի հիմնախնդրի կանոնակարգման համար իրավական հիմքերի ստեղծումն է: Հայեցակարգի առանցքային դրույթներից մեկն այն է, որ մշակվող պետական քաղաքականությունը պետք է նպաստի սեփականատերերի մասնակցային գործընթացին և խրախուսի հիմնախնդրի կանոնակարգումը»,- ասաց Ղուլարյանը: