«Nissan Pathfinder»-ը «Սատանի կամրջից» ընկել ու հայտնվել է բեռնատար գնացք տակ․ 3 դի հայտնաբերվել է գնացքի տակ՝ գծերի տարբեր հատվածներում, վարորդի դին ավտոմեքենայից դուրս են բերել փրկարարները

Երեկ՝ նոյեմբերի 18-ին, խոշոր ու ողբերգական դեպք է տեղի ունեցել Լոռու մարզում: Ժամը 23:20-ի սահմաններում, Վանաձոր-Ալավերդի ավտոճանապարհին՝ Փամբակի տարածաշրջանի շրջանցիկ կամրջից Nissan Pathfinder մակնիշի ավտոմեքենան դուրս է եկել երթեւեկելի գոտուց եւ ընկել երկաթգծի վրա: Այս մասին գրում է Shamshyan.com-ը:

Գնացքը բախվել է ավտոմեքենային ու մոտ 500 մետր վարել է գնացքը ու կայանել: Դեպքի վայր են ժամանել Արտակարգ իրավիճակների նախարարության փրկարար ծառայության Վանաձորի հրշեջ-փրկարարները, ովքեր այս պահին ՀՀ ոստիկանության պարեկային ծառայության Լոռու գումարտակի պարեկների հետ՝ գումարտակի հրամանատար Արմեն Բեժանյանի գլխավորությամբ և Հարավկովկասյան երկաթուղու նշված հատվածի աշխատակիցների հետ հատուկ տեխնիկայի միջոցով փորձում են մետաղե ջարդոնի վերածված ավտոմեքենայից դուրս բերել վարորդի դին, իսկ 3 ուղեւորների դիերը հայտնաբերվել են գնացքի տակ գծերի տարբեր հատվածներում:

Օպերատիվորեն ժամանել է նաեւ Վանաձոր բժշկական կենտրոնի շտապօգնության խումբը, ովքեր նույնպես դեպքի վայրում հերթապահություն են կատարում, որպեսզի անհրաժեշտության դեպքում, եթե պետք լինի, անհրաժեշտ օգնություն ցուցաբերեն: Դեպքի վայր են ժամանել ոստիկանության Լոռու մարզային վարչության պետ Արթուր Զաքարյանը, ոստիկանության Գուգարքի բաժնի պետ Մելինե Եղշատյանը, ոստիկանության Բազումի բաժնի պետ Դավիթ Պետրոսյանը: Ահազանգով ժամանել են ՀՀ քննչական կոմիտեի Լոռու մարզային քննչական վարչության պետ Սահակ Մկրտչյանը, վարչության պետի տեղակալ Դավիթ Ղազախեցյանը, քննիչներ Արմեն Սարիբեկյանը, Գառնիկ Տոնոյանը, Վահան Այվազյանը և Հայարփի Սահակյանը:

Դեպքի փաստով քննչական վարչությունում ստեղծվել է քննչական խումբ և նախաձեռնվել է քրեական վարույթ: Ոստիկանությունն ու քննչական վարչությունը պարզում են ավտոմեքենայի սեփականատիրոջ, վարորդի, սլաքավարի եւ մահացածների ինքնությունը: