Ռուսաստանը կէժանացնի՞ Հայաստանի գազը

Օրերս կառավարությունում վարչապետ Հովիկ Աբրահամյանի գլխավորությամբ քննարկման ժամանակ գործարարները խնդրել էին վարչապետին՝ ելնելով էներգակիրների գների համաշխարհային դինամիկայից, ԵՏՄ անդամակցության շրջանակներում դիմել Հայաստանի Հանրապետության ռազմավարական գործընկեր Ռուսաստանի Դաշնությանը` ներմուծվող գազի սակագնի նվազեցման և արտադրողների համար ազգային արժույթով գնագոյացման խնդրանքով:

Հնարավոր է, որ ՌԴ-ն Հայաստանի համար նվազեցնի գազի սակագինը  Newspress.am-ի հարցին ի պատասխան տնտեսագետ Վազգեն Սաֆարյանին, վերջինս նշեց, որ նավթի համաշխարհային գները նվազում են, տրամաբանական է, որ գազի գները ևս պետք է նվազեն:
Տնտեսագետը նաև նշեց, որ խնդիրը նաև այն, որ Հայաստանը գազի համար Ռուսաստանին վճարում է դոլարով, ոչ թե ռուսական ռուբլիով, որը մեզ ձեռնատու չէ:

«Ռուսական ռուբլիով վճարելու դեպքում Հայաստանը տարադրամ դուրս չի հանի երկրից», – ասաց նա:

Վ. Սաֆարյանը նաև նշեց, որ Հրազդանի ՋԷԿ-ը` լինելով ռուսական ընկերություն, կարող է գազն օգտագործել Ռուսաստանի ներքին գներով, որը էլէներգիայի որոշակի նվազում կգրանցի. տարբերություն չկա Սարատովում գործող ՋԷԿ-ի և Հազդանի ՋԵԿ-ի միջև:

Նշենք, որ այսօր ՀՀ սահմանին ռուսական գազի 1000 մետրն արժե 165 դոլար, Հայաստանն օգտագործում է շուրջ 2 մլրդ խմ գազ, որը վերջին տարիներին մի փոքր ավելացել է, քանի որ նախկինում օգտագործվում էր 1.6 մլրդ խմ:

Նավթն ու գազը փոխկապակցված են, եթե նավթի գները նվազում են` գազի գները ևս պետք է նվազեն: Գոնե նվազման դեպքում Ռուսաստանն ընդառաջ կգնա՞ Հայաստանին, որովհետև տարիների փորձը ցույց է տվել, որ Ռուսաստանը Հայաստանի նկատմամբ բարեհաճ չի գտնվել գոնե գազի հարցում: