Թույլ կտա՞ն արդյոք Ուկրաինային նստել բանակցությունների սեղանի շուրջ․ Լուկաշենկո

Բելառուսի նախագահ Ալեքսանդր Լուկաշենկոն՝ ելույթ ունենալով Երևանում կայացած ՀԱՊԿ Հավաքական անվտանգության խորհրդի նիստում, ասել է, որ պետք է դադարեցնել Ուկրաինայում արյունահեղությունը և խաղաղության բանակցություններ սկսել: Այս մասին հայտնում է ԲԵԼՏԱ-ն։

Նրա խոսքով՝ Բելառուսը մշտապես և համառորեն զգուշացրել է եվրոպական տարածաշրջանում ռազմաքաղաքական իրավիճակի վտանգավոր սրման մասին։

«Մենք մատնանշում էինք միջազգային անվտանգության համակարգի դեգրադացումը, զինաթափման և սպառազինությունների վերահսկման ոլորտում համաձայնագրերի արժեզրկումը։ Ցավոք, այն ժամանակ մեզ չլսեցին։ Եվ այս դիրքորոշման ողբերգական արդյունքը մենք տեսնում ենք այսօր Ուկրաինայում։ Արևմտյան երկրները մեղադրել և շարունակում են մեղադրել մեզ բոլոր մահացու մեղքերի մեջ: Նրանք ամբողջ ուժով փորձում են Բելառուսին ներքաշել այս հակամարտության մեջ։ Կիևն ապահովված է արևմտյան սպառազինությամբ և ռազմական տեխնիկայով: Ի՞նչ է դա, եթե ոչ անմիջական ներգրավվածություն հակամարտությանը։ Իսկ ինչպե՞ս հասկանալ ՆԱՏՕ-ի գլխավոր քարտուղարի հայտարարությունները, որն ասում է, որ Ուկրաինայի պարտությունը կնշանակի Հյուսիսատլանտյան դաշինքի պարտություն»,-նշել է Բելառուսի ղեկավարը։

Նա ուկրաինական իրադարձությունները համեմատել է ուժգնացող տորնադոյի հետ, որը ստեղծում է նոր խնդիրներ։

«Պետք է դադարեցնել այս արյունահեղությունը և խաղաղության բանակցություններ սկսել։ Հարցն այն է, թե թույլ կտա՞ն արդյոք Ուկրաինային նստել բանակցությունների սեղանի շուրջ»,- նշել է Լուկաշենկոն։