Վերահաստատում ենք մեր համախմբվածությունը և վճռականությունը՝ միասնաբար հաղթահարելու բոլոր դժվարությունները. Ավետիք Չալաբյան

Անցած շաբաթ երեկոյան, կնոջս և իմ տարեդարձների կապակցությամբ, մեր ընտանիքը մշակույթային երեկո էր կազմակերպել մեր հարազատների և ընկերների համար:  Այս մասին գրում է «Համախմբում» շարժման անդամ, «Արար» հիմադրամի համահիմնադիր Ավետիք Չալաբյանը:

«Հանդիսությունը տեղի ունեցավ Մեգերյան Կարպետ ընկերության ցուցասրահում, հիմնական կատարողը Միքայել Ոսկանյանի էթնո-ջազային նվագախումբն էր, երեկոյի ընթացքում հնչեցին նաև մեր ընկերների մի շարք ելույթներ և ողջույնի խոսքեր:

Երեկոն լավ առիթ էր բոլոր իմաստներով ծանր, դժվարին տարուց հետո հավաքվել իսկական համախոհներով և ընկերներով, և ևս մեկ անգամ վերահաստատել մեր միասնությունը, փոխադարձ սերն ու հարգանքը, գնահատել յուրաքանչյուրիս անցած ուղին, և նաև միասին նոր պլաններ կազմել:

Երեկոյի ընթացքում հյուրերի իրականացված բոլոր նվիրատվությունները ուղղվելու են «Արար» հիմնադրամին՝ աջակցելու Արցախում իրականացվող մեր զարգացման ծրագրերին: Դրանով մենք վերահաստատում ենք նաև ազգային տուրքի կարևորությունը, որով օժանդակում ենք մեր ազգի այն հատվածին, որն այսօր վտանգված է կամ այլապես բոլորիս օգնության կարիքն ունի, վերահաստատում ենք մեր համախմբվածությունը և վճռականությունը՝ միասնաբար հաղթահարելու բոլոր դժվարությունները:

Շնորհակալություն եմ հայտնում մեր բոլոր այն ընկերներին, որոնք միացան այս հանդիսությանը, որոնք շարունակաբար իրենց աջակցությունն են բերում մեր հայրենաշեն ծրագրերին, նաև մեր ընտանիքի երախտագիտությունն եմ հայտնում բոլոր այն մարդկանց և կազմակերպություններին, որոնց պրոֆեսիոնալ ջանքերի շնորհիվ այս երեկոն դարձավ իսկական մշակույթային իրադարձություն, և այդպիսի բավականություն պատճառեց իր բոլոր մասնակիցներին»: