Ամբարիչը տանենք-քանդենք․ ես անձամբ կգամ, թող ինձ դատի տան․ Հրաչյա Սարգսյանը՝ ապօրինի շինության մասին

Երևանի ավագանու նիստի ժամանակ քաղաքապետ Հրաչյա Սարգսյանն անդրադարձել է Ամիրյան փողոցի շենքերից մեկի տանիքին հայտնված ձեղնահարկին:

Հրաչյա Սարգսյանը հետաքրքրվեց, թե արդյո՞ք քաղաքացին կտուրի սեփականության վկայական ունի։ Պատասխանատուները նշեցին, որ տարածքը սեփականաշնորհված է, սակայն սեփականատերը շինթույլտվություն չունի:

«Կասեցված է, բայց կարող է գիշերով կամ առավոտով դնեն, հո՞ այդպես չի կարելի: Ամիրյան փողոցի վրա է, կարելի՞ է այդքան չսիրել Երևանը, ես չեմ պատկերացնում, ինչ է թե մի քառակուսի մետր բուդկա ավել ունենան, չուլան դնեն այնտեղ երևի, զիբիլը լցնեն մեջը»,- արձագանքեց քաղաքապետը։

Նա իրավաբանական վարչության պետ Տարոն Մարգարյանին հարցրեց, թե նման շինարարության դեպքում այլ քաղաքացիների իրավունքներն արդյոք չե՞ն խախտվում:

Վարչության պետը հայտնեց, որ հնարավոր է նման բան, բայց այդ բնակիչները պետք է իրենց իրավունքների համար դիմեն:

Տարոն Մարգարյանի խոսքով՝ օրենսդրական նախագիծ կա հարցի կարգավորման վերաբերյալ, որը քննարկման փուլում է և կփորձեն մինչև նրա ընդունվելը միջանկյալ լուծում գտնել:

Հրաչյա Սարգսյանը հանձնարարեց իրավական տեսանկյունից մանրամասնորեն ուսումնասիրել խնդիրն ու, միջանկյալ լուծում գտնելով, ապամոնտաժել անօրինական շինությունը:

«Պարո՛ն Մարգարյան, միջանկյալ լուծում գտեք, ամբարձիչը տարեք, ապամոնտաժեք այն Ամիրյան փողոցի վրայից: Պարո՛ն Ղուկասյան, ի՞նչ է պետք, ասեք, ես անձամբ կգամ այնտեղ: Անձամբ կգամ այդ քաղաքացուն կտեսնեմ՝ խի է այլանդակում քաղաքը: Եկեք ամբարձիչը տանենք՝ անենք դա: Ինչ է՝ ինձ պետք է դատի՞ տան, թող դատի տան… Ես անձամբ կգամ, թող ինձ դատի տան, ինչ է թե բազմաբնակարան շենքի վրա էլի բան են սարքում՝ բուդկա, ուրիշ ոչ մի բան չեմ կարող այն ավանեմ, չի կարելի այդքան չսիրել մեր քաղաքը»,- ասաց նա։