Մեր քույրերն ու եղբայրները զոհվել են, որ Հանրապետության հրապարակում մեր մանուկները ուրախանան ձեզ համար ֆոսֆորի նմանվող հրավառություններով ու ձեզ բթացնող տոնածառներով (տեսանյութ)

Որքանով ընդդիմությունը վերադարձել է Ազգային ժողով, այդքանով էլ չի վերադարձել: Այս մասին ԱԺ-ում հայտարարությունների ժամին իր ելույթում նշեց ԱԺ «Քաղաքացիական պայմանագիր» խմբակցության քարտուղար Արթուր Հովհաննիսյանը:

«Մարդիկ գալիս-գրանցվում են, գնում են իրենց գործերով, հետո հայտարարությունների ժամին գալիս են և, արի ու տես, հիշում են մեր քաղաքացիների սոցիալական խնդիրները: Զարմացած դեմքի արտահայտությամբ գալիս են ու այստեղ ներկայացնում տարբեր ընտանիքներին վերաբերող խնդիրներ: Ցավն այն է, որ այս մարդիկ հիշում են այս ընտանիքներին, ինչպես իրենց իշխանության ժամանակ, երբ քաղաքական խնդիր լուծելու հարց կա»,- ասաց Հովհաննիսյանը:

Արթուր Հովհաննիսյանն անդրադարձավ նաև երեկ Հանրապետության հրապարակում տեղի ունեցած տոնական միջոցառմանը:

«Մենք բոլորս աննկարագրելի բարդ ժամանակաշրջանով ենք անցել՝ մեծերը, մանուկները և մեզ պետք են լույսեր, մեզ պետք են գույներ, մեզ պետք են ժպիտներ: Հայաստանն ապրելու է, Հայաստանում տոներ են լինելու, մարդիկ միմյանց ծափահարելու են: Մենք այդ ամենն անելու ենք հանուն մեր այն քույրերի ու եղբայրների, որոնք իրենց կյանքը զոհաբերել են, որպեսզի Հանրապետության հրապարակում մեր մանուկները ուրախանան ձեզ համար ֆոսֆորի նմանվող հրավառություններով ու ձեզ բթացնող տոնածառներով: Ես ձեզ լիքը հրավառություններ ու լիքը տոնածառներ եմ մաղթում այս կապակցությամբ»,-ասաց նա: