«Աղի հանքի» հոգեբուժարանում հիվանդներին ծեծում են. (տեսանյութ)
«Ինձ ստիպում են հատակ լվամ, ինչ որ աշխատանք են տալիս, հիվանդներին անտեղի կապկպում են, ցավազրկող դեղ եմ ուզում` չեն տալիս, ծեծում են»,- Ավանի հոգեբուժարանում տիրող իրավիճակից դժգոհում է բուժվող 39-ամյա Արմեն Չատինյանը:
Նկատենք, որ newspress.am-ի նկարահանող խումբը Արմենին պատահաբար հանդիպեց: Նա եկել էլ Մամուլի տան դիմաց` հույսով, որ կհանդիպի որևէ լրատվամիջոցի, որին կարող է ներկայացնել իր խնդիրը:
Այն, որ հոգեբուժարաններում բարձիթողի վիճակ է և հիվանդների նկատմամբ ոտնձգություններ ու բռնություններ են կատարվում նորություն չէ: Սակայն չգիտես, թե ինչու ՀՀ առողջապահության նախարարությունն այս խնդրին անհաղորդ է: Համենայնդեպս մինչ օրս նախարարության կողմից չեն կատարվել այնպիսի քայլեր, որոնք ակնհայտորեն կնվազեցնեին առաջացող դժգոհությունները:
Ինչ վերաբերում է հենց Ավանում գտնվող, կամ ինչպես ասում են «Աղի հանքի» հոգեբուժարանին, ապա այստեղ իրավիճակը նույնն է: Ավելին, երբ 2014թ-ին հոգեբուժարանի տնօրեն նշանակվեց Արեգա Հակոբյանը, հենց հոգեբուժարանի աշխատակիցները դժգոհության ալիք բարձրացրին: Վերոհիշյալ տարվա փետրվարին, բուժանձնակազմը նամակ է ուղղել առողջապահության նախարարությանն, ընդդեմ Արեգա Հակոբյանի: Նամակում մասնավորապես ասվում էր.
«Միայն սեփական գրպանի պարունակությամբ մտահոգ, բնակչության հոգեկան առողջության համար կարևորագույն նշանակություն ունեցող և իր կողմից ղեկավարվող բուժհաստատությունը որպես «դուքան», իսկ իր պաշտոնը` որպես «խոպան» դիտարկող անձն իրավունք չունի գտնվել մեկ շարքում բարեխիղճ, հմուտ, հարգանքի արժանի, իրենց հիվանդների ապաքինմամբ մտահոգ և հոգատար բժիշկների հետ:
Արեգա Հակոբյանը հոգեբուժական ախտորոշում ունեցող հիվանդին, հիվանդի հարազատին և նույնիսկ իր ղեկավարությամբ աշխատող բժշկին դիտարկում է միայն որպես եկամտի աղբյուր` քայլող-խոսող թղթադրամ…»:
Սակայն հարկ է նկատել, որ Առողջապահության նախարարությունն այս բողոքներն անտեսեց և այսօր հոգեբուժարանի տնօրենի պաշտոնում Արեգա Հակոբյանն է:
Այս պաշտոնում դեռ նրա թեկնածության ժամանակ լուրեր էին շրջանառվում, որ «Առողջապահության նախարարության մարդն է»… Այդպես է դա թե ոչ, քննարկելի է, ակնհայտ է, որ այսօր տնօրենի անբարեխիղճ աշխատանքից դժգոհություններ կան, որոնք թեև հասնում են նախարարության ականջին, սակայն մնում են անարձագանք:
Մանրամասները` տեսանյութում
