Ատեստավորման և հավելավճարների խնդիրը բերելու է ԶՈւ-երից արտահոսքի. Սեյրան Օհանյան (տեսանյութ)
Զինծառայողների սոցիալական ապահովածության խնդիրը զինվորական ծառայության գրավչության ամենակարևոր ուղղություններից մեկն է, բայց տվյալ առաջարկություններով չպետք է այնպիսի տպավորություն ստեղծվի, որ Զինված ուժերում ատեստացիոն համակարգ գոյություն չունի։ Այս մասին ԱԺ-ում իր ելույթի ժամանակ ասաց ԱԺ «Հայաստան» խմբակցության ղեկավար Սեյրան Օհանյանը՝ «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ կատարելու մասին և «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքների նախագծերի փաթեթը երկրորդ ընթերցմամբ և ամբողջությամբ ընդունելու մասին հարցի քննարկման ժամանակ։
Սեյրան Օհանյանի խոսքով՝ յուրաքանչյուր կառույցում գոյություն ունեն ատեստացիոն հանձնաժողովներ, որոնց ղեկավարներն են հրամանատարների տեղակալները և համապատասխան հանձնաժողովներում եզրակացություններ են տրվում, թե տվյալ զինծառայողը համապատասխանո՞ւմ է պաշտոնին, թե՞ ոչ, կամ արժանի՞ է առաջխաղացման։
«Տվյալ առաջարկությամբ, փաստորեն, զինված ուժերի ատեստացիոն ամբողջ համակարգը մենք կապում ենք հավելավճարների հետ, որը «Հայաստան» խմբակցությունը գտել է՝ ճիշտ չէ և համապատասխան առաջարկություններ է արել, որոնց հիմնավորման մեջ նշել ենք, որ տվյալ սկզբունքով ներկայացված ատեսավորման և հավելավճարների խնդիրը բերելու է Զինված ուժերից արտահոսքի, ոչ հավասար պայմանների և նաև մարտական գործողությունների ժամանակ անհավասար պայմաններ են լինելու. մեկը, ով հավելավճար է ստանում, կարող է տեղի տալ, իսկ մյուսը կարող է հերոսանալ»,- ասաց Օհանյանը։
Նա ներկայացրեց իրենց խմբակցության առաջարկությունը, որը նաև Պաշտպանության նախարարին են ներկայացրել. «Առաջարկությունը հետևյալն է՝ այդ հարցը կարգավորել հետևյալ կերպ. Զինված ուժերի ատեստացիոն համակարգը թողել նույն կերպ, բայց մասնագիտական որակավորումների կարգեր կան՝ երրորդ, երկրորդ, առաջին, վարպետներ և այդ մասնագիտական որակավորումների կարգերի ընդունման ընթացակարգերն ավելի խստացնել և հավելավճարները ներկայացնել միայն այդ կարգավորման սկզբունքներում։ Սա է մեր առաջարկությունը եղել, որը գտնում ենք հիմնավորված»։
ԱԺ-ն «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ կատարելու մասին և «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքների նախագծերի փաթեթն երկրորդ ընթերցմամբ և ամբողջությամբ ընդունեց՝ կողմ 65, դեմ 0, ձեռնպահ 26 (ընդդիմադիր պատգամավորներ) ձայների հարաբերակցությամբ։
