Սահմանային բնակավայրերում պայմանագրային զինծառայողները և՛ սահման են պաշտպանել, և՛ սոցիալական խնդիր լուծել. Սեյրան Օհանյան

Ժամկետային ծառայությունից պայմանագրայինին անցնելու գաղափարը դեռ 2010 թվականին է առաջ քաշվել, ինքս եմ դրա հիմնավորումները տվել և կողմ եմ դրան, սակայն դեմ եմ, երբ համալրման գործընթացին տալիս են «Պաշտպան հայրենյաց» և նման այլ անուններին. դրանք ընդամենը պետք է լինի համալրման մեջ ժամկետայինից պայմանագրայինի անցնելու կետը: Այս մասին ԱԺ-ում իր ելույթի ժամանակ ասաց ԱԺ «Հայաստան» խմբակցության ղեկավար Սեյրան Օհանյանը՝ «Պետական պաշտոններ և պետական ծառայության պաշտոններ զբաղեցնող անձանց վարձատրության մասին» օրենքում լրացումներ կատարելու մասին և «Զինվորական ծառայության և զինծառայողի կարգավիճակի մասին» օրենքում փոփոխություններ և լրացումներ կատարելու մասին օրենքների նախագծերի փաթեթը երկրորդ ընթերցմամբ և ամբողջությամբ ընդունելու մասին հարցի քննարկման ժամանակ։

Սեյրան Օհանյանի խոսքով` կախված խնդիրներից, ՀՀ ԶՈւ-ն դեռ երկար ժամանակ խառը համալրում է ունենալու՝ և՛ պայմանագրային, և՛ ժամկետային ծառայության տեսքով: Պաշտպանության նախկին նախարարը նկատում է, որ երկար տարիներ պայմանագրային ծառայությունը ներդնելով՝ ՊՆ-ն նաև սոցիալական խնդիրներ է լուծել:

«Հատկապես սահմանային բնակավայրերում պայմանագրային զինծառայողները երկու խնդիր են իրականացրել: Առաջին՝ սահմանների պաշտպանությունը՝ համալրելով տվյալ տարածքի զորամասերը և սոցիալական խնդիրներ են լուծել՝ զբաղվելով գյուղատնտեսությամբ և դրանից եկամուտ ստանալով»,- ասաց «Հայաստան» խմբակցության ղեկավարը:

«Հայաստան» խմբակցության ղեկավարը նշեց, որ «Պաշտպան հայրենյաց» ծրագրով ժամկետային զինծառայողը 6 ամիս ուսումնական գործընթացը անցնելուց հետո կարող է ընտրել պայմանագրային ծառայությունը։

««Ես եմ»-ը, «Պաշտպան հայրենյաց»-ը զինված ուժերի համալրման ռազմավարության մեջ ժամկետային ծառայությունից պայմանագրային ծառայության անցնելու կետը պետք է լինեն»,- եզրափակեց Սեյրան Օհանյանը։

Նա նաև հայտնեց, որ «Հայաստան» խմբակցության ղեկավարը նաև հայտնեց, որ ընդդիմությունն օրենսդրական փոփոխությանը կողմ կքվեարկի: