Իրան-Վրաստան գազամուղ. գործարք Հայաստանի գլխավերևով

Դեկտեմբերին Երևանում կայացած քառակողմ բանակցություններից հետո հայտարարվեց, որ Հայաստանը, Իրանը, Վրաստանը և Ռուսաստանը պայմանավորվել են ստեղծել համակարգող խումբ՝ չորս երկրները կապող էներգետիկ միջանցք ստեղծելու համար:

Իրանական կողմը նախատեսում է Հայաստանն օգտագործելով տարանցիկ երկիր տարեկան Վրաստան արտահանել մինչև 500 միլիոն խորանարդ մետր գազ:

Արդյոք նման իրավիճակը, երբ Հայաստանը տարանցիկ է հանդիսանում միայն Իրանի և Վրաստանի միջև, չի՞ նշանակում, որ դա գործարք է Հայաստանի գլխավերևով:

Նման հարցադրումով  Newspress.am դիմեց իրանագետ Վարդան Ոսկանյանին: Վերջինս նշեց, որ պետք է հստակեցնել, թե ի՞նչ նպատակ ունի Հայաստանը` Իրանից գա՞զ է ցանկանում գնել, թե՞ տարանցիկ երկիրն է նպատակը: Ներկայումս գործում է գազ էլեներգիայի դիմաց սխեման
«Առայժմ միայն Հայաստանը տրանզիտի հնավորություն ունի»,- ասաց իրանագետը:

Նա նաև գտնում է, որ տրանզիտ լինելու մեջ որևէ բացասական բան չկա, քանի որ այս դեպքում երկիրը որոշակի եկամուտներ է ստանալու, նա օրինակ բերեց Վրաստանը, որը ադրբեջանական էներգակիրների համար տարանցիկ երկիր է, Վրաստանը նաև Ռուսաստանից Հայաստան մտնող գազատարի համար է տարանցիկ:

Վ. Ոսկանյանը նաև շեշտեց, որ ՀՀ սահմանին ռուսական գազը` 1000 խմ 165 դոլար, ամենէժան գազի սակագներից է: Միաժամանակ հիշեցրեց, որ Իրանը խոսում է Հայաստանի միջոցով Վրաստան գազ հասցնելու մասին, այլ ճանապարհ չի նշվում:
Իրանական կողմը գազը միջազգային շուկայում առաջարկում է 400 դոլարով:

Հիշեցնենք, որ Իրան-Հայաստան 700 միլիմետրանոց գազատարը շահագործման է հանձնվել 2007-ին: Սակայն այն անհրաժեշտ ճնշման պարագայում, մասնագետների փոխանցմամբ, կարող է տարեկան առավելագույնն ապահովել մինչև 2 միլիարդ խորանարդ մետր գազ՝ մոտավորապես այնքան, որքան սպառում է Հայաստանը մեկ տարում: