ԼՂ հարցն Ադրբեջանի համար դարձել է «փիղը սենյակում», այսինքն` խնդիրը կա, սակայն փորձում են ձևացնել, որ այն չկա. ԱԽ քարտուղար

Հայկական կողմը շարունակելու է աշխատել, որպեսզի հասկանան, թե որն է պայմաններ ստեղծելու այն մեխանիզմը, որպեսզի ԼՂ–ի և Ադրբեջանի միջև քննարկում տեղի ունենա պայմանավորվածության շուրջ։ ԱԺ–ում հայտարարեց ԱԽ քարտուղար Արմեն Գրիգորյան:

Նա նշեց, որ վերջին շրջանում միջազգային գործընկերների հետ աշխատանքներում նկատել են՝ նրանց կողմից էլ հետաքրքրություն կա այս ուղղությամբ աշխատանքները շարունակելու։

«Հույս ունեմ, որ կկարողանանք հասնել մեր նպատակներին»,-ասաց նա:

ԱԽ քարտուղարը նշեց նաև, որ վաշինգտոնյան բանակցությունների ժամանակ հայկական կողմն իր հավանությունն է տվել այն հարցին, որ խաղաղության պայմանագիր կնքելն ու ԼՂ–ում ապրող հայերի իրավունքների և անվտանգության հարցերը պետք է տարանջատվեն։ Նրա խոսքով` այժմ, սակայն, երբ ԼՂ հարցով միջազգային մեխանիզմի վերաբերյալ որևէ հստակություն չկա, այն դժվարացնում է հայկական կողմին խաղաղության պայմանագրի կնքելու հարցով առաջ գնալ։

ԱԽ քարտուղարը հավելեց, որ Ադրբեջանի մեկ այլ մոտեցում, թե Ղարաբաղի հարցը լուծված է, որևէ ձև չի օգնում առաջ ընթանալ։ Նրա խոսքով` ԼՂ հարցն ադրբեջանական կողմի համար դարձել է «փիղը սենյակում», այսինքն` խնդիրը կա, սակայն փորձում են ձևացնել, որ այն չկա։