Ավինյան Տիգրանն իրականացրեց Սուքիասյան Խաչատուրի ցանկությունը՝ օրենք խախտելով․ մնացածը տեսարան էր «հպարտ քաղաքացիների» համար

Երեկ Երևանի փաստացի քաղաքապետ աշխատող, մինչդեռ իրականում ընդամենը Հրաչիկ Սարգսյանի տեղակալ Տիգրան Ավինյանը «հպարտ քաղաքացիներին» նոր թեմա էր բերել՝ «ծամելու».

«Ապամոնտաժման հերթը հասավ պատմության թանգարանի շենքից կառչած կրպակին: Բացառություններ չկան. քաղաքի տեսքն աղճատող ամեն ինչ նույն վերջն է ունենալու»,- ֆեյսբուքյան իր էջում «ավետեց» նա։ 

Հպարտ քաղաքացիներն, իհարկե, ուրախացան, քննարկեցին՝ այդպես էլ խորամուխ չլինելով՝ արդյոք այդ «քանդումն» օրինական էր, թե՞ ոչ և ի վերջո, ինչու քաղաքն աղճատող հարյուրավոր «օբյեկտներից» ընտրվեց հենց այդ մեկը, ում էր դա պետք։ 

Իսկ պատճառները, NEWSPRESS․am-ի տեղեկություններով՝ շատ ավելի խորքային են և շատ ավելի «հեռվից» են գալիս։ 

Այս կրպակը ներկայիս սեփականատերերը սկսել են շահագործել 2016 թվականից․ 2018-ի իշխանափոխությունից հետո գործող կրպակի «հարևանը»՝ իշխանական գործարար-պատգամավոր Խաչատուր Սուքիասյանի անվան հետ կապվող PinkBerry-ն, սկսել է լծվել արդեն ապամոնտաժված կրպակն այդտեղից վերացնելու գործին՝ ոչ բառացի, ոչ անձամբ, բայց «տակից», «չերեզ-չերեզ» հասկացրել են, որ այդ կրպակը պետք է հանել այդտեղից։

Այսպես․ այդ ժամանակվանից ի վեր, Նիկոլ Փաշինյանի ձեռքի տակ աշխատող տարբեր քաղաքապետերի քաղաքապետարանն ամսական մի քանի անգամ դիմել հարկայինին, ՍԱՏՄ-ին, որպեսզի վերջիններս ստուգումներ անեն, ճնշումներ գործադրեն, ի վերջո հասնեն այդ կրպակի՝ այդտեղից հեռացմանը։ Մինչդեռ, բազմակի ստուգումները, ի հեճուկս, քաղաքապետարանի, թերություններ չեն արձանագրել։

Դրանից զատ, Երևան քաղաքի դատախազությունը քննություն է սկսել ու պարզել, ու առևտրի կրպակն օրինական է գործել, հանցակազմ չկա․ հենց այդ հիմքով էլ քրեական գործը կարճվել է։

Քաղաքապետարանը դիմել է նաև Ոստիկանության կենտրոնականի բաժին։ 20-21 թթ․ ոստիկանությունը հետաքննություն է սկսել ու հանցադեպերի բացակայությամբ մերժվել են քաղաքապետարանի դիմումները։ 

Միևնույն ժամանակ, Քաղաքապետարանն առտևրի թույլտվություն չի տվել, հետո եկել ակտավորել է, թե՝ թույլտվություն չունեն։ Սեփականատերերն էլ բողոքարկել են քաղաքապետարանի որոշումներն ու ամեն անգամ հաղթել դատարանում։ 

Երեկ՝ դեպտեմբերի 8-ի առավոտյան արդեն, Երևանի կենտրոնում, ոստիկանների աչքի առաջ տեղի է ունեցել կրպակի ապամոնտաժման ապօրինի և ոչ իրավաչափ գործողությունը, քանի որ դատարանը հայցի ապահովման միջոց է կիրառել` արգելելով ցանկացած գործողություն։ Դա նշանակում է, որ կրպակը չպետք է ապամոնտաժվեր:

Հավանաբար, դա է պատճառը, որ քանդման աշխատանքների ժամանակ որևէ մեկը հանձն չի առել ներկայացնել, թե որն է քանդող հիմնարկը՝ քաղաքապետարա՞նը, թաղապետարա՞նը․․․ ո՞վ։

Դեպքի վայրում գտնվող՝ Քաղաքապետարանի առևտրի վարչության պետը և հասարակական կարգի ապահովման վարչության պետը, հայտարարել են, որ իրենք գործողություն չեն անում․ ընդամենը դիտորդ են։ Ոստիկանությունը ևս չի ներկայացրել, թե որ կառույցն է դիմել իրենց՝ այդտեղ հասարակական կարգ ապահովելու։

Ստացվում է, որ Ոստիկանությունը հիմք չի ընդունել դատարանի վճիռը ու չի կանգնեցրել ապօրինի ապամոնտաժումը․ տեղում աշխատող ոստիկաններն անգործություն են դրսևորել։ 

Շեշտենք, բազում-բազմաթիվ գործեր կան դատարանում, որոնց բոլորի դեպքերով կրպակի սեփականատերերը շահել են դատերը, մինչդեռ իրեն արդեն Երևանի քաղաքապետը պատկերացնող Ավինյանն իրականացնում է Գռզո մականունով հայտնի գործարարի «վաղուցվա ցանկությունը»։ Եթե այդպես չէ, ապա սպասենք, տեսնենք, թե քաղաքի տեսքն աղճատող, մայթին հերթեր առաջացնող-մայթը փակող PinkBerry-ն ևս նույն վերջը կունենա՞, թե՞ Ավինյանի խոսքերը փուչիկ են՝ «հպարտների» ամենօրյա «կուտ»

Եվ զավեշտալին այս պատմության մեջ այն է, որ Երևանի ճարտարապետական տեսքն աղճատելուց խոսում է մեկը, ում ղեկավարությամբ նույն Հանրապետության հրապարակի շենքերի վրա մի քանի հազար ծակ են արել, իսկ ինքն էլ մանկական արդարացումներ է գտել այդ՝ ծակ ուղեղների արած ծակերը փակելու համար․․․ 

NEWSPRESS.am