Սենյակում մենակ չեն եղել. «Հրապարակ»

«Հրապարակ» թերթը գրում է.

«Հայ-ադրբեջանական խաղաղության պայմանագիրը ոչ մի կերպ գլուխ չի գալիս, ավելին՝ լարումը նկատելիորեն ավելանում է մեր տարածաշրջանում։ Իսկ վերջին օրերին պաշտոնական Բաքուն ու Երևանն իրարամերժ հայտարարություններ են տարածում։

Նախօրեին Անվտանգության խորհրդի քարտուղար Արմեն Գրիգորյանը հայտարարեց, թե վաշինգտոնյան հանդիպմանը ինքն ու Ադրբեջանի նախագահի օգնականը համաձայնել էին՝ ստեղծել միջազգային մեխանիզմ, որի շրջանակներում Ստեփանակերտն ու Բաքուն պետք է քննարկեին Ղարաբաղի հայերի իրավունքները եւ անվտանգությունը:

Ալիևի օգնական Հիքմեթ Հաջիեւը, սակայն, երեկ կեղծիք որակեց Գրիգորյանի հայտարարությունը՝ պնդելով, թե միջազգային մեխանիզմ ստեղծելու որևէ համաձայնություն ձեռք չի բերվել։

Ավելին՝ շեշտեց, թե սեպտեմբերի 27-ին Սպիտակ տանն ԱՄՆ անվտանգության հարցերով խորհրդական Ջեք Սալիվանի կազմակերպած հանդիպմանը եւս մեկ անգամ շեշտել են, որ Ադրբեջանը որեւէ միջազգային գործընկերոջ հետ չի քննարկելու «Ղարաբաղում ապրող հայ բնակչության անվտանգության և իրավունքների հարցերը», և որ դա իրենց ներքին գործն է։ Երեկ Արմեն Գրիգորյանն էլ իր հերթին հերքեց Հաջիևի խոսքերը՝ պնդելով, թե պայմանավորվածությունը ձեռք բերելու ժամանակ սենյակում մենակ չեն եղել. «Բանակցությունները որ ընթացել են, սենյակում միայն հայկական կողմը չի եղել, ամերիկյան կողմն էլ է եղել, և կա արձանագրություն դրա մասին, որի մասին ադրբեջանական կողմը տեղյակ է»։

Նկատենք, որ մինչ օրս հայկական կողմը չէր գաղտնազերծում, որ Ադրբեջանի հետ կոնկրետ պայմանավորվածություն կա՝ Բաքվի և Ստեփանակերտի միջեւ ուղիղ բանակցությունների համար միջազգային մեխանիզմ ստեղծելու հետ կապված։ Պաշտոնական Երևանը միայն նշում էր, թե այդ խնդրի շուրջ քննարկումներ են ընթանում, եւ որ Ադրբեջանի հետ խաղաղության պայմանագրում Ղարաբաղի հարցը չպետք է ներառել։ «Որովհետեւ երբ որ Վաշինգտոնում քննարկումներ ենք ունեցել, եւ ավելի հստակություն է մտցվել միջազգային մեխանիզմի ստեղծման վերաբերյալ, մենք հավանություն ենք տվել, որ հարցերը տարանջատվեն։ Բայց երբ միջազգային մեխանիզմի վերաբերյալ որեւէ հստակություն չկա, ապա դա դժվարացնում է հայկական կողմին խաղաղության պայմանագրի մասով առաջ գնալ»,- երեկ պարզաբանել է Գրիգորյանը։

Ստացվում է՝ ի հեճուկս իշխանականների լավատեսության, թե մինչեւ տարեվերջ խաղաղության պայմանագիրը կստորագրվի, այն անորոշ ժամկետով հետաձգվում է՝ դրանից բխող բոլոր վտանգավոր հետեւանքների հեռանկար առաջացնելով։

Ամբողջական հոդվածը կարող եք կարդալ այս հասցեով՝ : https://hraparak.am/post/f80993f36685e562bdfb3c8f64282f2b