Իշխանություններն իրենց ձեռքերը լվացել են. հադրութեցի Անի Առաքելյանն ընտանիքի հետ Հայաստանում է. նա դուրս է եկել ակցիայի՝ ի պաշտպանություն Արցախի
Այս ակցիայի նպատակը մեր ձայնն ավելի հնչեղ բարձրացնելն է՝ թե՛ ԱՄՆ դեսպանատան, թե՛ Ֆրանսիայի դեսպանատան ներկայացուցիչների շրջանում: Այն երկրների շրջանում, որոնք կարող են մի փոքր ազդեցություն ունենալ Թուրքիայի և Ադրբեջանի վարած քաղաքականության վրա: Այս մասին լրագորղների հետ զրույցում ասաց հադրութեցի Անի Առաքելյանը, որը մասնակում է երիտասարդների կողմից կազմակերպած ակցիային՝ ի պաշտպանություն Արցախի:
«Իշխանությունները միգուցե իրենց ձեռքերը լվացել են: Լվացել են իրենց կատարած աշխատանքով ու վերաբերմունքով: Մտածում եմ, որ մենք՝ երիտասարդներս, մեր հայ ժողովրդի հետ կարող ենք ազդել այդ գործողությունների վրա և բացել միակ ճանապարհը, որն Արցախը միացնում է ՀՀ-ին: Հիմա 120 հազար հայ սպասում է մեր օգնությանը ու մենք չենք կարող գնալ աշխատանքի կամ տանը նստել, սպասել ինչ-որ իշխանության աշխատանքի: Չենք կարող, չի ստացվի»,-նշեց Անի Առաքելյանը:
Նրա խոսքով՝ ՀՀ-ում 20 հազար մարդ կա, սակայն չի կարող ասել, թե ինչու հիմա ակցիային չեն մասնակցում, սակայն ինքն իր ընկերների և ընտանիքի հետ ակցիային է մասնակցում:
