Արցախի և Ադրբեջանի միջև չկան բանակցություններ, կան շփումներ ռուս խաղաղապահների միջոցով․ Ստեփանակերտ

Արցախի իշխանությունները, արցախյան կողմը ռուս խաղաղապահների միջոցով շփումների մեջ է ադրբեջանական կողմի հետ։ Այլ տարբերակ չկա։ Այս մասին այսօր մամուլի ասուլիսում, պատասխանելով լրագրողի համապատասխան հարցին, ասաց Արցախի ԱԳ նախարարի ժ/պ Դավիթ Բաբայանը։ 

«Բնական է՝ բոլոր համապատասխան կառույցներն ու ներկայացուցիչներն այնտեղ են, անուններ չտանք, բոլորը։ Երկրի ղեկավարից սկսած, մինչև համապատասխան տարբեր կառույցներ, զբաղվում են հարցի հանգուցալուցմամբ։ Արցախի և Ադրբեջանի միջև չկան բանակցություններ, կան շփումներ»,- ասաց Բաբայանը՝ օրինակներ բերելով, թե երբ, ասենք, քաղաքացի է մոլորվում կամ էլեկտրալար են կտրում, իրենք շփումներ են սկսում։  

Բաբայանը նշեց, որ ակնհայտ է, որ բնապահպանական խնդիր չկա, Լաչինի միջանցքում մարդիկ են, ովքեր ծառայում են ադրբեջանական բանակի հատուկ ծառայություններում։

«Եթե իրենք ունեն բնապահպանական խնդիրներ, այդպե՞ս են վարվում։ Մենք էլ ունենք բնապահպանական խնդիրներ, հարցեր իրենց։ Դուք բոլորդ տեղյակ եք ինչպիսի ֆոսֆորային ռումբեր են օգտագործել 44-օրյա պատերազմի ժամանակ։ Այդ բոլորն արձանագրված են։ Եթե ուզում են հարց քննարկել, ձև կա դա անելու, ոչ թե գալ, փակել և կաթվածահար անել։ Երեխաներ կան, որոնք հիվանդ են, սնունդ, դեղորայք է պետք, բնապահպանական հարցն ի հաշիվ ցեղասպանությա՞ն են իրականացնում»։ 

Ըստ Բաբայանի՝ կա մի նրբություն ևս՝ բնապահպանության պատրվակի տակ վաղը նրանք ասելու են, որ պետք է փակել Կաշենի հանքը, Base Metal գործարանը։

«Սա մեր տնտեսության կարևորագույն լոկոմոտիվներից մեկն է, որն, ի միջի այլոց, բոլոր բնապահպանական նորմերը պահպանում է»,- ասաց Բաբայանը։