Հրապարակվեց Սերժ Սարգսյանի գործով առանցքային վկայի նախաքննական ցուցմունքը. դատական նիստը հետաձգվեց

Երևանի Ավան և Նոր Նորքի ընդհանուր իրավասության դատարանում նախագահությամբ Վահե Միսակյանի, ՀՀ երրորդ նախագահ Սերժ Սարգսյանի, «Ֆլեշ» ընկերության սեփականատեր Բարսեղ Բեգլարյանի և Գյուղնախարարության բուսաբուծության վարչության նախկին պետ Գևորգ Հարությունյանի գործով դատական նիստին շարունակվեց գործով առանցքային վկա Սևան Քոչարյանի հարցաքննությունը։

Նախորդ դատական նիստին Սևան Քոչարյանը հարցաքննվել էր, ինչից հետո մեղադրող կողմը միջնորդել էր դատարանին՝ հրապարակել նախաքննության ընթացքում տված ցուցմունքները, նշելով, որ նախաքննության ընթացքում տված ցուցմունքի և դատական նիստին տված ցուցմունքի միջև հակասություններ կան։ Դատարանը բավարարել էր դատախազի միջնորդությունը և այսօրվա նիստին դատավարության կողմերն անցան նախաքննության ընթացքում տված ցուցմունքի հրապարակմանը։

Ըստ նախաքննության ցուցմունքի՝ վկան 2013 թվականին տեղեկացել էր Գյուղնախարարության հայտարարած մրցույթի՝ 27 միլիոն տոննա վառելիքի ներմուծման մասին և որոշել էր «Սովրանո» ընկերության միջոցով մասնակցել։ Նա իմացել է, որ մրցույթին մասնակցել են երեք ընկերություններ՝ «Սովրանո» ընկերությունը՝ 1 լիտրի դիմաց 425 դրամ առաջարկով, «Մաքս գրուպ» ընկերությունը՝ 420 դրամ, և «Ֆլեշ» ընկերությունը՝ 440 դրամ: Հաղթող էր ճանաչվել «Մաքս գրուպ» ընկերությունը, հետագայում, սակայն, ընկերությունը հրաժարվել էր մատակարարումից։ Առաջարկը պետք է փոխանցվեր «Սովրանո» ընկերությանը, սակայն, գյուղնախարարությունից ընկերության հետ կապ չեն հաստատել և վառելիքը ձեռք են բերել 440 դրամով՝ «Ֆլեշ» ընկերությունից:

«Մրցույթի օրը, 17։30-ի սահմաններում, ինձ է զանգահարում «Ֆլեշ» ընկերության տնօրեն Յաշա Խաչատրյանը և ասում՝ ՊՆ-ից պրծար, հիմա էլ գյուղատնտեսությանն ես անցել։ Ես հասկացա, որ մրցույթի կանոնները խախտվել են, որովհետև մրցույթի արդյունքները պետք է հրապարակվեին ժամը 18.00-ին, սակայն, 17.30-ին Յաշան արդեն գիտեր, որ ես էլ եմ մասնակցել մրցույթին»,- նշված էր նախաքննական ցուցմունքում։

Գործով վկան լսողության հետ կապված խնդիրներ ունի և նրա փաստաբանը դատարանին միջնորդեց, որպեսզի ցուցմունքի գրավոր տարբերակը նաև վկային տրամադրվի, դատարանը բավարարեց միջնորդությունը և տրամադրեց ցուցմունքի գրավոր տարբերակը։ Վկան դատարանին հայտնեց, որ իրեն մի քանի օր է անհրաժեշտ իր տված ցուցմունքներին ծանոթանալու համար։

Գործով դատական նիստը հետաձգվեց և նշանակվեց 2022 թվականի հունվարի 12-ին։

Ըստ մեղադրական եզրակացության՝ Սերժ Սարգսյանի կազմակերպմամբ և Բարսեղ Բեգլարյանի դրդմամբ, Սամվել Գալստյանի ու Գևորգ Հարությունյանի օժանդակությամբ, Սերգո Կարապետյանի կողմից 2013 թվականի հունվարի 25-ից փետրվարի 7-ն ընկած ժամանակահատվածում ՀՀ կառավարության պահուստային ֆոնդից վատնվել է պետական աջակցության ծրագրերի իրականացման ընթացքում իրացված 15.391.765 լիտր դիզելային վառելիքի համար հատկացված սուբսիդիայի առանձնապես խոշոր չափերով գումարը՝ 489.160.310 ՀՀ դրամ:

Սերժ Սարգսյանին մեղադրանք է առաջադրվել ՀՀ ՔՕ 38-179-րդ հոդվածի 3-րդ մասի 1-ին կետով՝ առանձնապես խոշոր չափերով յուրացնելը կամ վատնելը։ Երրորդ նախագահն իրեն առաջադրված մեղադրանքը չի ընդունում, նրա պաշտպաններն էլ այս գործընթացը որակում են որպես քաղաքական հետապնդում։