Մենք ձեր ոտքերը չենք ընկնում, չենք խնդրում, պահանջում ենք իրականացնել ձեր պարտականությունները. Արտակ Բեգլարյան

Մեր պահանջը միջազգային հանրությունից հանձինս ՄԱԿ-ի և նրա Անվտանգության խորհրդի 5 մշտական անդամներից այն է, որ իրենք իրենց պարտականությունները կատարեն: Այս մասին ՄԱԿ-ի գրասենյակի դիմաց բողոքի ակցիայի ժամանակ հայտարարեց Արցախի պետնախարարի խորհրդական Արտակ Բեգլարյանը, ով նախօրեին անժամկետ նստացույց է հայտարարել ՄԱԿ-ի գրասենյակի դիմաց:

«Մենք խնդրանք չունենք իրենցից, մենք իրենց ոտքերը չենք ընկնում, մենք պահանջում ենք, որ որպես միջազգային հանրության լիիրավ անդամ, որպես մարդկային քաղաքակրթության և հատկապես եվրոպական քաղաքակրթության մեջ մեծ ներդրում ունեցող ազգի մի մաս, մենք պահանջում ենք մեր բաժին արդարությունը, մեր բաժին ուշադրությունը, մեր բաժին պաշտպանությունը, որը ոչ միայն բարոյական հարց է, այլև միջազգային իրավական պարտավորություն է:

Մեր պահանջը ՄԱԿ-ից՝ պետք է դադարեն խոսելուց, և պետք է գործեն: Պետք է հստակ գնահատականներ տրվեն Ադրբեջանի գործողություններին ոչ թե քաղաքական, այլ իրավական բառապաշարով, որովհետեւ սա ցեղասպանական գործողություն է, սա ահաբեկչություն է: Պետք է Ալիևին հանցագործ ռեժիմ հայտարարել»,-ասաց նա:

Բեգլարյանի խոսքով, իրենք պահանջում են, որ ՄԱԿ-ի համապատասխան գրասենյակի և առաքելությունների ներկայացվածություն ապահովեն Արցախում, և ՄԱԿ-ի ԱԽ ընթացակարգերով քննարկել և լուծել Արցախի ժողովրդի իրավունքների ու անվտանգության ապահովման կայուն միջազգային երաշխիքներ:

«Իրենք կարող են որոշել մեխանիզմը, կարող են որոշել խաղաղապահ առաքելությունների կազմը, մանդատը: Երբ ժամանակը գա, Արցախը իր պաշտոնական կարծիքը կհայտնի: Մենք ակնկալում ենք, որ միջազգային հանրությունը պետք է տեր կանգնի Արցախի ժողովրդին»,-ասաց նա՝ հավելելով, որ պահանջում են նաև Արցախի ինքնորոշման ճանաչում «ճանաչում հանուն փրկության» սկզբունքով:

Արտակ Բեգլարյանը պահանջեց, որ Հայաստանում ՄԱԿ-ի մշտական համակարգողի պաշտոնակատար, զուգահեռաբար նաև ՅՈՒՆԻՍԵՖ–ի ներկայացուցիչ Քրիսթինե Վայգանդը դուրս գա և հակիրճ ներկայացնի վերջին 3-4 օրվա ընթացքում կատարած աշխատանքները:

«Նա պետք է դուրս գա մեր առջև, մեզանից վախենալու ոչինչ չկա, ոչ ոքի չենք կծում։ Երեկվանից մի խումբ արցախցիներով ու ՀՀ քաղաքացիներով նստացույց ենք անում, թող գա և հակիրճ ասի, թե ինչ են արել այս մի քանի օրը»,– ասաց նա։

Նա ներկայացրեց Արցախում առկա իրավիճակը` երկրում վերջանում է մանկական կաթի փոշին, բազմաթիվ երեխաներ զրկված են դպրոց գնալու հնարավորությունից, արդեն դեղորայքի խնդիր կա, դադարեցված է գազամատակարարումը։

Ակցիայի մասնակիցները սկսեցին վանկարկել «Պահանջում ենք», սակայն ոչ ոք նրանց մոտ այդպես էլ դուրս չեկավ։