Եթե Արցախի Հանրապետությունը չճանաչվի, ապա կվերանա․ Ավետիք Չալաբյան

Մենք անընդհատ փորձում ենք այդ հարցից խուսափել․ Արցախի Հանրապետությունը պիտի ճանաչած լինեինք դեռևս 2016 թ Ապրիլյան պատերազմից հետո։ Բնականաբար, 2020թ․ պատերազմի ժամանակ այս իշխանությունը պարտավորությունն էր Արցախը ճանաչել, քանի որ Ադրբեջանը, պատերազմ սկսելով, դուրս էր եկել բանակցային գործընթացից և ըստ էության մեր հայելային արձագանքը կլիներ Արցախի Հանրապետության ճանաչումը։ Այս մասին այսօր ի պաշպանություն Արցախի բողոքի ակցիայի ժամանակ ասաց հանրային գործիչ Ավետիք Չալաբյանը։ 

«Ամեն անգամ մեզ ասում են՝ Արցախի Հանրապետությունը պետք չի ճանաչել, որովհետև էս կլինի, էն կլինի։ Եկեք հակառակը նայենք՝ եթե Արցախի Հանրապետությունը չի ճանաչվում, ի՞նչ է լինելու իր հետ՝ ինքը կվերանա։ Որովհետև Ադրբեջանը շատ լավ հասկանալով Հայաստանում գործող իշխանությունների կրավորական, պարտվողական դիրքորոշումը, անընդհատ, միլիմետր առ միլիմետր, փորձում է առաջ գալ ու հարվածել թույլ կետերին։ Մի օր դա կլինի Քարագլուխի բարձունքը, մի օր՝ միջանցքը, մի օր՝ գազը, մի օր՝ Սև լիճը։ Մենք պետք է մեր կողմից անենք այն գործողությունները, որոնք ինչ-որ իմաստով Ադրբեջանի բոլոր գործողություններն իմաստազրկում են։ Եթե մենք ճանաչում ենք Արցախի Հանրապետությունը և ամբողջ աշխարհում քարոզչություն ենք սկսում Արցախի ճանաչման, վաղ թե ուշ, ուրիշ երկրներն էլ են սկսելու միանալ, ուրիշ երկրները մեզ չեն մեղադրելու կեղծավորության մեջ, ինչպես ՌԴ նախագահը մեղադրեց, թե դուք չէիք ճանաչել Արցախը, մեզանից ի՞նչ էիք ուզում,- ասաց Չալաբյանը։ 

Նրա խոսքով՝ ամեն անգամ, երբ Ադրբեջանը սադրանքների է գնում, մեզ հնարավորություն է տալիս ճանաչման։

«Նա մեզ հնարավորություն է տալիս ասելու՝ Ադրբեջանը մեզ փորձում է բնաջնջել։ Ի՞նչ է մեզ մնում, քան ճանաչել Հանրապետությունն ու պաշտպանել»։