Գեղարքունիքի մարզում դանակահարվել է երևանցի 31-ամյա տղամարդ. նա հիվանդանոցի ճանապարհին մահացել է (լուսանկարներ)

Երեկ՝ դեկտեմբերի 18-ին, սպանություն է տեղի ունեցել Գեղարքունիքի մարզում։ Ժամը 20։15-ի սահմաններում «Գավառ» բժշկական կենտրոնից ոստիկանության Գավառի բաժին ահազանգ է ստացվել, որ բժշկական կենտրոնի շտապօգնության խումբն իրենց մոտ է տեղափոխել տղամարդու դի։

Ինչպես հայտնում է shamshyan.com-ը, ոստիկաններն ու քնիչները պարզել են, որ մահացածը Երևանի բնակիչ 31-ամյա Էդվարդ Հ․-ն էր։

Դատաբժշկի նախնական եզրակացության համաձայն՝ նա եղել է դանակահարված, մարմնի տարբեր մասերին կտրած-ծակած վնասվածքներով։

Ոստիկանությունում պարզել են, որ մահացածին շտապօգնության ավտոմեքենան հիվանդանոց է տեղափոխել Գավառ քաղաքի Սայադյան փողոցի 15 հասցեից։

Տեղում պարզվել է նաև, որ նշված տունը պատկանում է Գավառի բնակիչ 42-ամյա Սարգիս Մ․-ին։ Տունը, որը երկհարկանի է, 1-ին և 2-րդ հարկերի տարբեր սենյակներում ոստիկաններն ու քննիչները հայտնաբերել են բազմաթիվ արնանման հետքեր։

Դեպքի փաստով Գեղարքունիքի մարզային քննչական վարչության պետ Ա․ Բաղդասարյանի որոշմամբ ստեղծվել է քննչական խումբ, որտեղ սպանություն հատկանշներով նախաձեռնվել է քրեական վարույթ, և խմբի ղեկավար է նշանակվել ավագ քննիչ Լևոն Նազարյանը։

Աղբյուրի փոխանցմամբ, նույն օրը՝ ժամը 20։00-ի սահմաններում նշված հասցեում Գավառի բնակիչ 48-ամյա տղամարդը (նախաքննության շահերից ելնելով, այս պահին որոշ մանրամասներ չենք հրապարակում) կենցաղային հարցերի շուրջ վիճաբանել է Էդվարդ Հ․-ի հետ, որի ժամանակ էլ դանակով հարվածներ է հասցրել վերջինիս, ինչի հետևանքով նա մահացել է։ Կասկածյալը տաք հետքերով հայտնաբերվել և տեղափոխվել է ոստիկանության Գավառի բաժին, որտեղից էլ նրան ներկայացրել են Հայաստանի քննչական կոմիտեի Գեզարքունիքի մարզային քննչական վարչություն, որտեղ էլ քննիչի որոշմամբ, որպես կասկածյալ, ձերբակալվել է։

Սպանվածն ու սպանության կակածանքով ձերբակալվածը նախկինում մի քանի անգամ եղել են դատապարտված։