Փաշինյանը թաքցնում է ժողովրդից այն, ինչն իրեն հասանելի է՝ թեև ինքն էլ 100 տոկոսով իրազեկված չէ. Այվազյան

Հայ ժողովուրդը չունի բավարարաչափ տեղեկատվություն իր իսկ երկրի շուրջը ծավալվող միջազգային առևտրի և սպասվող զարգացումների մասին։ Ֆեյսբուքյան գրառմամբ նման դիտարկում է արել ռազմական պատմաբան Արմեն Այվազյանը։

«Փաշինյանը թաքցնում է ժողովրդից այն, ինչն իրեն հասանելի է, թեև ինքն էլ 100 տոկոսով իրազեկված չէ։ Որոշումների մասին հայությունը տեղեկանում է դրանց իրագործումից հետո միայն՝ պոստ-ֆակտում։ Պաշտոնական և ոչ-պաշտոնական «ընդդիմությունները» չեն առաջարկում ժողովրդին գործողողությունների հստակ և ընդունելի ծրագիր։ Տարբեր օտար ուժային կենտրոնների տեղական «տեղեկատվական գործակալները» շարունակում են շաղ տալ կիսով չափ կեղծ, կիսով չափ ճիշտ սկանդալային տեղեկություններ՝ սպասարկելով իրենց տերերին, խճճելով պարզ իրադարձությունները և անորոշության մեջ կաթվածահար անելով հանրային ակտիվությունը։

Կեղծիքների և անհայտության մեջ դեգերող Հայաստանի (ներառյալ Արցախի) մեր ժողովուրդն ունի, այսուհանդերձ, մեկ տեսանելի և վստահելի փարոս, որի ուղղությամբ էլ պետք է արագորեն շարժվի։ Այդ փարոսը ՀԱՄԸՆԴՀԱՆՈՒՐ ԻՆՔՆԱՊԱՇՏՊԱՆՈՒԹՅԱՆ ԿԱԶՄԱԿԵՐՊՈՒՄՆ է։ Դա է Հայաստանի և հայության իրական ազգային օրակարգը։ Միայն այդպես կարելի է չեզոքացնել կամ նվազեցնել արտաքին ճնշումներն ու ապահովագրել ազգի և պետության լինելիությունը»,- գրել է Այվազյանը։