Փոքր ու միջին բիզնեսին չեն թողնում, որ շնչի. ձեռներեց (տեսանյութ)
«Փոքր և միջին ձեռնարկատիրության պետական աջակցության մասին» ՀՀ օրենքը միայն թղթի վրա է ամրագրված, իրականում փոքր ձեռնարկատերերը ոչ մի աջակցություն չեն ստանում: Սա այն դեպքում, երբ դեռ 2001 թվականից կառավարությունն անընդմեջ հայտարարում է, թե Հայաստանում փոքր ու միջին բիզնեսը տնտեսության զարգացման գերակա ուղղություններից մեկն է:
Ու այս ամպագորգոռ հայտարարությունների մեջ էլ հենց խոսվում է ՓՄՁ-ներին օժանդակելու նպատակով` ՀՀ օրենքով պետության կողմից ղեկավարման նոր համակարգ ստեղծելու ուղղությամբ ձեռնարկվող քայլերի մասին: Բայց և այնպես ոլորտի վիճակը հեռու է բավարար համարվելուց: Եթե բոլոր քաղաքակիրթ ու զարգացած երկրներում պետությունն ամեն կերպ աջակցում է փոքր և միջին բիզնեսի զարգացմանը, ապա մեր երկրում կառավարությունը ամեն կերպ խոչընդոտում է անհատ ձեռներեցների գործունեությանը: Ու ստացվում է այնպես, որ հատկապես մարզերում, փոքր ու միջին ձեռներեցությունը սոցիալապես անապահով խավին օգնելու և ֆինանսապես ապահովելու փոխարեն, քամում է նրանց փողերն ու տանում սնանկության:
Աննա Մանուկյանն անհատ ձեռներեց է: Բիզնեսը փոքր է, վարկերը` շատ: newspress.am-ի հետ զրույցում նա անկեղծացավ. «Երբ չէինք սկսել բիզնեսը` պարտքեր չունեիք ու նորմալ ապրում էինք, հենց դրեցինք գործը` խրվեցինք պարտքերի մեջ: Երբեմն այս մտքից ուզում եմ խելագարվել…»:
Պատմում է, որ երբ ուզում էր բիզնես վարկ վերցնել ու սկսել գործը, վարկատուները հայտնել են, թե բիզնես վարկեր կարող են տրամադրել միայն բիզնեսն սկսելուց 6 ամիս հետո: Սակայն, 6 ամիս անցել էլ, պարզվել է, որ բոլոր բանկերը վարկ են տրամադրում միայն գրավով: Այս դեպքում, թերևս, ավելորդ է խոսել բիզնեսի աջակցման կամ բիզնես-վարկ տրամադրելու մասին, քանի որ գրավադրմամբ վարկը ՓՄՁ-ներին ոչ մի արտոնություն չի վերապահում: Աննա Մանուկյանը մի քանի կարճաժամկետ վարկ է վերցրել, հույս ունենալով, որ բիզնես վարկով կփակեր պարտքերն ու կխթաներ գործին, սակայն այդպես չեղավ: Մի կողմից հարկերը, մյուս կողմից վարկերը: Սրանց էլ ավելանում է էլեկտրաէներգիայի թանկացումն, ինչի արդյունքում նախորդ ամսվա համեմատ ծախսված էներգիայի դիմաց կրկնակի գումար են վճարել:
Աննա Մանուկյանը մեկն է այն բազում անհատ ձեռներեցներից, ով իր փոքր բիզնեսով փորձել է հացի խնդիր լուծել, սակայն գործը հակառակ արդյունքն է տվել:
«Եթե այսպես շարունակվի, ապա բոլորը կփակեն իրենց խանութները ու կլքեն Հայաստանը: Բայց դրանով երկրում փոքր ու միջին բիզնեսի հարցը չի լուծվի: Դա ելք չէ: Մենք ուզում ենք մնալ մեր երկրում ու մեր բիզնեսն ունենալ: Ակնկալում ենք պետության օժանդակությունը»,- եզրափակեց Աննան:
Մանրամասները` տեսանյութում
