Ճանապարհի մերկասառույցը շղթայական վթարի պատճառ է դարձել․ ՊՈԱԿ-ը չի մաքրում, իսկ քաղաքապետը աչք է փակում (տեսանյութ)

«Եթե վաղն էլ ձյուն գա՝ մեքենաները պատրաստ են ձնամաքրման աշխատանքին»։

Այս հայտարարությունը արել է Երևանի «Աղբահանություն և սանիտարական մաքրում» ՊՈԱԿ-ի տնօրեն Հովհաննես Մանուկյանը՝ քաղաքապետարանի գործակարգավարական խորհրդակցություններից մեկի ժամանակ։

Սակայն, ասելը մի բան է, իսկ գործնականում հնարավորությունները ցույց տալը՝ այլ․․․

Երևանում Դավիթաշենի կամրջի վրա 2 տասնյակից ավելի մեքենաներ բախվեցին հենց այն պատճառով, որ ՊՈԱԿ-ը, փաստորեն, պատրաստ չէր ձմռան մաքրման աշխատանքներին ու ճանապարհին մերկասառույց էր։ Իհարկե, խիտ մառախուղի պատճառով կար նաև վատ տեսանելություն, սակայն այն, որ ճանապարհը նաև սառած է եղել, և դրա դեմն առնելու համար ոչինչ չի արվել՝ փաստ է։

NEWSPRESS.am-ի տեղեկություններով՝ երբ Հովհաննես Մանուկյանին ասել են, որ ճանապարհներին մերկասառույց կա, որի դեմը պետք է առնել, վերջինս պատասխանել է, թե՝ դա իր ֆունկցիաների մեջ չի մտնում։

Հատուկ մասնագետ կամ քիմիկոս պետք չէ լինել իմանալու համար, որ գոյություն ունեն հակազդող նյութեր, որոնք հատուկ տեխնիկայի միջոցով, կամ երբեմն նաև ձեռքով (թեև ձեռքով աշխատանքը դժվար է, բայց եղել է նաև այդպես) լցնում են մերկասառույցի վրա ու մաքրում փողոցները։

Հարկ է նկատել, որ մերկասառույցի դեմ այդ հակազդող նյութերով փողոցները մաքրելը բոլոր ժամանակներում եղել է սանմաքման ընկերությունների գործառույթում։

Թեև Հովհաննես Մանուկյանի դեպքում զարմանալու ոչինչ չկա։ 

NEWSPRESS.am-ը բազմիցս է անդրադարձել, թե Հովհաննես Մանուկյանի «թեթև ձեռքով» ինչպես են մեքենաները շարքից դուրս գալիս։

Մեր տեղեկություններով՝ աղ ցանող մեքենաներն ամռանը չեն փոխվել ջրցանների (մեքենաները բազմաֆունկցիոնալ են, աղցան, ջրցան և ձյուն մաքրող), ինչի հետևանքով աղը կոռոզիա է առաջացրել և այդ մեքենաներից շատերն արդեն հնարավոր չէ գործարկել։

Շատերը գուցե հիշեն, որ երբ նախորդ տարի Երևանի քաղաքապետը, դարձյալ գործավարական խորհրդակցություններից մեկի ժամանակ, անդրադարձավ եղանակային պայմաններին և ձնամաքրման աշխատանքներին, Հովհաննես Մանուկյանը հայտարարեց, թե՝ «Եթե մի քանի օր ձյունը շարունակվի, աղի պաշարները չեն բավականացնի»:

Սա այն դեպքում, երբ ողջ ձմեռ գրեթե ձյուն չէր եկել ու ձյան 2 օրվա տեղումներն արդեն խնդիրների առաջ էին կանգնեցրել ՊՈԱԿ-ի ղեկավարին։

Այլ կերպ ասած՝ տնօրենի անբարեխիղճ աշխատանքի պատճառով ձեռքից գնում է մի ողջ կառույց՝ քաղաքապետի քթի տակ ու հավանաբար նաև նրա իմացությամբ (քանի որ ոչինչ չի ձեռնարկում այդ ամենի դեմն առնելու համար)։ Ասում են նաև, որ Մանուկյանին հենց քաղաքապետն է հովանավորում։

Ի դեպ, չար լեզուներն ասում են, որ ՊՈԱԿ-ի վարչակազմի մի ներկայացուցիչ անգամ ձեռք է բարձրացրել աշխատողներից մեկի վրա՝ զուտ այն պատճաով, որ վերջինիս աշխատանքային ժամն ավարտվել է ու նա չի համաձայնվել ավելի երկար աշխատել․․․

Բայց այս մասին թերևս հաջորդիվ․․․ իսկ մինչ այդ հարկ է նկատել, որ եթե քաղաքապետը շարունակի «չտեսնել» վերոհիշյալ ՊՈԱԿ-ի ղեկավարի կամայականություններն ու վատնումները, ապա շատ շուտով այդ կառույցը կդադարի գործելուց․․․

Արմինե Մկրտումյան