Պետք է ճնշել Ադրբեջանին, եթե Արցախը սովամահ լինի, ո՞ւմ են պետք սանկցիաները և ճնշումները. Դավիթ Բաբայան

ՄԱԿ-ի Անվտանգության խորհրդի երեկվա նիստը շատ կարևոր էր: Այն, որ հարցն արդեն ՄԱԿ-ի ԱԽ է հասել ու ընդգրկվել է օրակարգում, ինքնին շատ կարևոր էր: «Փաստինֆո»-ի հետ զրույցում ասել է Արցախի արտգործնախարարի պաշտոնակատար Դավիթ Բաբայանը:

Նա կարևորել է բոլոր այն ելույթները, որով երկրները դատապարտել են Ադրբեջանին ու կոչ արել անհապաղ բացել Լաչինի միջանցքը և ապաշրջափակել, ապապաշարել Արցախը։

«Արցախը հիմա և՛ պաշարված է, և՛ շրջափակման մեջ է»,-հավելեց նախարարը:

Ինչ վերաբերում է ՄԱԿ-ի ԱԽ նիստում Ռուսաստանի ներկայացուցչի ելույթից, որը շատ քննադատությունների առիթ տվեց, Դավիթ Բաբայանը նշել է.

«Ռուսաստանի ներկայացուցիչը նույնպես կարևորեց ապաշրջափակումը, աշխատանքեր են տարվում այս ուղղությամբ:Մենք այն ծանր վիճակում ենք, որ եթե իրեն քաղաքագետի տեղ դրած ամեն մեկի ասածին պատասխանենք, ճիշտ չի լինի:Այս պահին կարևորն Արցախը ապաշրջափակելն է, Ռուսաստանն էլ է այս ուղղությամբ ահռելի աշխատանք տանում»,-ասաց Բաբայանը:

Արցախի ԱԳ նախարարը բավարար է գնահատում միջազգային հանրության արձագանքը Լաչինի միջանցքի շրջափակման հարցում, բայց շեշտում է՝ հայտարարություններից բացի, ճնշումներ էլ են պետք գործադրել Ադրբեջանի վրա.

«Լավ կլինի, որ բանաձևեր ընդունվեն՝ պարտադիր կիրառման համար, սա կլինի կարևոր, իդեալական մոտեցում: Խոսքից գործի է պետք անցնել, ճնշել Ադրբեջանին, եթե Արցախը սովամահ լինի, ո՞ւմ են պետք սանկցիաները և ճնշումները»,-ասաց Դավիթ Բաբայանը: