102 հազար կազմակերպություններ կբացահայտեն իրական շահառուներին. օրենքը կգործի հունվարի 1-ից

2023 թվականի հունվարի 1-ից բոլոր իրավաբանական անձինք պարտավոր են ներկայացնել իրական շահառուների վերաբերյալ հայտարարագիր: Այս մասին մամուլի ասուլիսի ժամանակ ասաց ՀՀ արդարադատության նախարարության Իրավաբանական անձանց պետական ռեգիստրի գործակալություն պետ Տաթև Մկրտչյանը:

Նա նշեց, որ ավելի քանի 102 հազար կազմակերպության համար ուժի մեջ է մտնում իրական շահառուներին բացահայտելու պարտավորությունը. «Այս գործընթացն իրականացնում ենք փուլային տարբերակով: Մեկնարկը տրվել է 2020 թվականից, երբ հայտարարագիր ներկայացնելու պարտավորություն սահմանվել էր հանքարդյունաբերության ոլորտում գործունեություն իրականացնողների համար: 2021 թվականի սեպտեմբերից համապատասխան պարտավորությունը դրված էր տեսալսողական մեդիա ծառայություն իրականացնող և հանրային ծառայությունների կարգավորման ոլորտում գործունեություն իրականացնող իրավաբանական անձանց համար:

2022 թվականի հունվարի սկզբից պարտավորությունը ստանձնել են բոլոր իրավաբանական անձինք, բացառությամբ ոչ առևտրային կազմակերպությունների և միայն ֆիզիկական անձ մասնակից ունեցող ՍՊԸ-ների: Եվ ահա 2023 թվականի հունվարից բոլոր իրավաբանական անձինք, առանց բացառության, պետք է ներկայացնեն հայտարարագիր»,-ասաց Տաթև Մկրտչյանը: 

Հայտարարագիրը կազմված է մի քանի բաժնից, տեղեկություններ են լրացվում միջանկյալ իրավաբանական անձանց, իրական շահառուների մասին տվյալներ: Հայտարարագրով ստացված տվյալները բաց են լինելու, այսինքն՝ պետական ռեգիստրի գործակալության կայքում հասանելի են լինելու բոլոր իրավաբանական անձանց իրական շահառուների վերաբերյալ տեղեկությունները:

Նշված պարտավորության ժամկետը լրանում է 2023 թվականի մարտի 1-ին։ Իրական շահառուների վերաբերյալ հայտարարագիր ներկայացնելու պարտականություն ունեցող անձի կողմից օրենքով սահմանված ժամկետում իրական շահառուների վերաբերյալ տեղեկություններ չներկայացնելն առաջացնում է վարչական պատասխանատվություն։

Տաթև Մկրտչյանը տեղեկացրեց, որ սկզբում կլինի նախազգուշացում, հաջորդ փուլում հնարավոր է լինի նաև վարչական տուգանք մինչև 100 հազար դրամի սահմաններում: