Աղվան Վարդանյանը երկու լավ նորություն ունի

Թույլ տվեք ձեզ բերել իրական օրակարգ: Այս մասին այսօր Ազգային ժողովում, դիմելով ՔՊ խմբակցության պատգամավորներին՝ ասաց ԱԺ «Հայաստան» խմբակցության պատգամավոր Աղվան Վարդանյանը:

«Արցախը շրջափակված է, Քարվաճառը հանձնված է, երկրորդ ճանապարհ չկա: Հիմա էլ Բերձոր-Լաչինի միջանցքը, որ, կարծեմ, նախկիններն են բացել: Ծայրահեղ սահմանային իրավիճակ, նոր բան չէ՝ 90-92 էլ էր Արցախը շրջափակված բոլոր կողմերից: Հայաստանի հետ միակ կապն ուղղաթիռն էր, բայց կար մի աննշան տարբերություն. այն ժամանակ և՛ Արցախում, և՛ Հայաստանում իշխանություն կար, երկուսի նպատակ նույնն էր՝ անկախ պետականություն և Արցախ, Արցախ՝ իբրև աննկախ պետականության հիմք: Հիմա Հայաստանում ՔՊ իշխանություն է, առանց պետական մտածողության, առանց Արցախի, իշխանություն՝ իշխանություն համար: Արցախում նույն վիճակն է, կամ սրա ածանցյալը, նաև՝ խառն են: Բնականաբար, չկա համախմբում, չկա քաղաքական, պետական կամք՝ ճգնաժամը հանգուցալուծելու: Միակ քաղաքականությունը՝ խնդրել ուրիշներին, որ մեր օգտին մի բան անեն: Մուրացկանություն: Մուրացկանին չեն հարգում, մուրացկանին խղճում են: Օգնեն էլ՝ մուրացկան է մնալու»,- նշեց Վարդանյանը:

Ընդդիմադիր պատգամավորն ասաց, որ երկու լավ նորություն ունի՝ առաջին. ինչպես 90-ականներին ապաշրջափակվելու ենք՝ բոլոր առումներով, Արցախը, Հայաստանը, տարածաշրջանում գործոն են դառնալու, երկրորդ լավ նորությունը՝ ՔՊ չի լինելու: