Անցնող տարվա ամենաաղմկահարույց քրեական գործերը. «Հրապարակ»
«Հրապարակ»-ը գրում է.
2022 թվականին իրավապահ համակարգի կողմից բազմաթիվ քրեական գործեր հարուցվեցին, որոնց մեծամասնությունը դեռեւս նախաքննության փուլում է։ Այդ գործերից շատերը ոչ այլ ինչ էին, քան քաղաքական ընդդիմադիր հայացքներ ունեցողների դեմ իշխանությունների կողմից ձեռնարկված քաղաքական հետապնդումներ։ Ստորեւ ներկայացնում ենք մի շարք քրեական գործեր, որոնք մշտապես ԶԼՄ-ների ուշադրության կենտրոնում են եղել եւ հասարակական մեծ հնչեղություն են ստացել, եւ որոնց մեջ կան քաղաքական հետապնդման տարրեր։
1. 2022 թվականի սեպտեմբերին քրեական մեղադրանք առաջադրվեց 44-օրյա պատերազմի ժամանակ Պաշտպանության բանակի հրամանատար Ջալալ Հարությունյանին։ Նա մեղադրվում է Քրեական օրենսգրքի 550-րդ հոդվածի 3-րդ մասով, այն է՝ ռազմական դրության, պատերազմի ժամանակ ծառայության նկատմամբ անփույթ վերաբերմունքը։
2. Ջալալ Հարությունյանին մեղադրանք առաջադրելուց մի քանի օր առաջ՝ օգոստոսի 30-ին, հայտնի դարձավ, որ մեղադրանք է առաջադրվել նաեւ 44-օրյա պատերազմի ժամանակ ՊԲ եւս մեկ հրամանատարի՝ Միքայել Արզումանյանին, ով եւս մեղադրվում է նույն արարքը կատարելու՝ ծառայության նկատմամբ անփութություն դրսեւորելու մեջ։ Հիշեցնենք, որ 44-օրյա պատերազմի առաջին փուլում Արցախի պաշտպանության բանակի հրամանատարը Ջալալ Հարությունյանն էր, ով ծանր վիրավորվեց, եւ երկրորդ փուլում նրան փոխարինեց հայտնի Միշկան՝ Միքայել Արզումանյանը։
3. Տարվա սկզբին՝ մարտ ամսին, մեղադրանք առաջադրվեց 44-օրյա պատերազմից անմիջապես հետո արտակարգ իրավիճակների նախարար նշանակված եւ Հայաստանի ազգային հերոսի բարձրագույն կոչմանն արժանացած Անդրանիկ Փիլոյանին։ Փիլոյանին էլ մեղադրանք է առաջադրվել պաշտոնեական լիազորությունները չարաշահելու եւ կաշառք ստանալու համար։ Պարզվեց՝ մեղադրանքի հիմքում ջեռուցման կաթսան տուն տանելը եւ ինչ-որ պաշտոնների նշանակելու համար կաշառք վերցնելն է։ Նրան մի քանի ամիս պահեցին կալանքի տակ, ապա ազատ արձակեցին։
4. Զինված ուժերի գլխավոր շտաբի նախկին պետ Արտակ Դավթյանին այս տարվա հունվարի 10-ին մեղադրանք էր առաջադրվել հայտնի «անորակ հրթիռների» գործով։ Դավթյանին մեղադրանք է առաջադրվել ՀՀ քրեական օրենսգրքի 375-րդ հոդվածի 3-րդ մասով` պետի (հրամանատարի) կամ պաշտոնատար անձի կողմից իշխանությունը կամ պաշտոնեական դիրքը չարաշահելը, իշխանազանցությունը կամ պաշտոնեական լիազորությունների սահմանն անցնելը, ինչպես նաեւ իշխանության անգործությունը, եթե այդ արարքները կատարվել են շահադիտական, անձնական այլ շահագրգռվածությունից կամ խմբային շահերից ելնելով, եւ եթե դրանք նյութական ծանր հետեւանքներ են առաջացրել: Այդ գործով մեղադրյալները մի քանիսն են, այդ թվում՝ պաշտպանության նախկին նախարար Դավիթ Տոնոյանը, զենքի ներկրմամբ զբաղվող Դավիթ Գալստյանը, ԶՈՒ շտաբի պետի նախկին տեղակալները, ՊՆ ավիացիոն վարչության պետը։
5․ Մայիս ամսին ընդդիմության փողոցային պայքարի շրջանում մեղադրանք առաջադրվեց «Համախմբում» շարժման անդամ Ավետիք Չալաբյանին։ Նրան մեղադրում էին նյութապես շահագրգռելով հավաքներին մասնակցելուն հարկադրելու մեջ։ Քրեական գործի հարուցման պատճառ էր դարձել մի մոնտաժված ձայնագրություն, որում ագրարային համալսարանի ուսխորհրդի նախագահ Թոռնիկ Ալիյանն ասում է, թե կարող է մինչեւ 2 հազար ուսանող մասնակից դարձնել բողոքի ակցիաներին, եթե նյութական աջակցություն լինի։ Ու թեեւ Չալաբյանի պատասխանից հասկանալի չէ՝ այդ գումարները վճարվելու են, թե ոչ, բայց նրան կալանավորեցին եւ երկար ժամանակ կալանքի տակ պահեցին։ Մեծ թվով հանրային գործիչներ միջնորդում էին, որ նրա կալանքը փոխվի, սակայն իշխանությունը նրան 3 ամսից ավելի պահեց կալանքի տակ։
6. Տարեվերջին՝ նոյեմբերին, մեղադրանք առաջադրվեց ՀՀԿ փոխնախագահ Արմեն Աշոտյանին։ Նրան առաջադրված մեղադրանքը վերաբերում է Բժշկական համալսարանի հոգաբարձուների խորհրդի նախագահի ժամանակահատվածին, երբ Բժշկական համալսարանն Իշխան Սաղաթելյանի հորը պատկանող հանգստյան տանը սենյակներ է ձեռք բերել, որը եւ օգտագործվել է ԵՊԲՀ կարիքների համար։ Աշոտյանին այս գործով մեղադրանք է առաջադրվել փողերի լվացման համար, նա այս մեղադրանքն աբսուրդ եւ քաղաքական հետապնդում է համարում իր նկատմամբ։
7. Հոկտեմբերի 17-ին ձերբակալվեցին դատավոր Արուսյակ Ալեքսանյանը եւ փաստաբան Էրիկ Ալեքսանյանը։ Փաստաբանը, որն ընդդիմադիրների գործերով էր մասնակցում դատավարություններին, մոտ մեկ շաբաթ առաջ ազատ է արձակվել։ Փաստաբանական համայնքը հայտարարություններ արեց, որով գնահատական տվեց այս գործին, որ փաստաբանը կալանավորվել է մասնագիտական գործունեության համար, նրա գործողություններին դատավորի կողմից լիազորությունների չարաշահմանն աջակցելու որեւէ քայլ չի եղել։
